Mërgimtari nga Gjermania, Halil Haxhija, ka ndihmuar zjarrfikësit në Drenas me pajisje shërbimi, në vlerë rreth dy mijë euro.
Afrim Gjeli, nga shërbimi i zjarrfikësve në këtë komunë, ka thënë për emisionin SOT në KTV se fiskajat profesionale të dhuruara nga Haxhijaj janë tejet të rëndësishme sidomos për zjarret në ambientet e brendshme.
“Zoti Haxhijaj ka ndihmuar zjarrfikësit me dy fiskaja profesionale që shërbejnë më së shumti për zjarre të brendshme. Është kosto e lartë. Po shpresojmë që edhe mërgimtarë të tjerë do të shprehin vullnetin për të ndihmuar”, ka thënë ai.
Në këtë intervistë, Gjeli ka thënë se njësiti i zjarrfikësve në këtë komunë ka 17 zjarrfikës, teksa ka shtuar nevojën për një nënstacion në Komoran.
Gjeli ka thënë se ky njësit s’qëndron keq me automjete e pajisje në raport me numrin e punëtorëve, por ka shtuar se “s’mund të themi se jemi shumë të kënaqur”.
Për hir të dhurimit të këtyre pajisjeve për zjarrfikësit, Komuna e Drenasit ka ndarë mirënjohje në shenjë falënderimi për Haxhijajn.