Të premten seanca e Kuvendit

Haxhiu: Emërimin e anëtarëve të KQZ-së është dashur ta përfundonte Osmani

Photo: Driton Paçarada

Kryetarja e Kuvendit dhe ushtruesja e detyrës së presidentes, Albulena Haxhiu, derisa ka folur për mosemërimin e anëtarëve të KQZ-së, ka deklaruar se këtë çështje është dashur ta përfundonte ish-presidentja Vjosa Osmani.

Sipas saj, nuk është në rregull që një çështje që ka nisur më herët, të mbetet e papërfunduar.

“Një proces kushtetues që ka nisur më herët është dashur të përfundohet në mandatin e presidentes Vjosa Osmani siç është edhe kjo çështja e anëtarëve të Komisionit Qendror të Zgjedhjeve. Nuk mendoj që është në rregull që një proces që ka nisur më herët të jetë i papërfunduar. Do t’i trajtoj të gjitha çështjet që janë me prioritet. Sapo të kemi një analizë të të gjitha këtyre shkresave, aktgjykimeve e aktvendimeve natyrisht që do të veprojmë me kohë”, ka thënë Haxhiu pas përfundimit të mbledhjes së Kryesisë së Kuvendit të Kosovës.

Haxhiu foli edhe për hapjen e faqes së re të Presidencës në rrjetet sociale. Ajo tha se llogaritë në rrjetet sociale nuk janë të individëve dhe se ato duhet të mbesin si trashëgimi.

“Me qëllim që ne t’i njoftojmë qytetarët e Republikës së Kosovës me aktivitet e Presidencës jemi detyruar të hapim faqe të tjera. E di që dikujt i është dukur teknike, e di që është trajtuar si çështje që nuk ka nevojë për diskutim por edhe si kryetare e Kuvendit edhe si ushtruese e detyrës së Presidentes e kam për obligim të tregoj transparencë. Faqet zyrtare nuk janë të individëve, ato duhet të mbesin si pronë dhe trashëgimi e institucionit”, ka thënë Haxhiu.

Tutje për mbledhjen e Kryesisë ka thënë se pikat e propozuara të rendit të ditës të seancës së Kuvendit të Kosovës që do të mbahet të premten, nuk u miratuan për shkak se e gjithë mbledhja u vijua me diskutimin që rezoluta e PDK-së për mbrojtjen e të vërtetës historike të luftës a të jetë pikë e parë e rendit të ditës, a e fundit.

Haxhiu deklaroi se ajo ka propozuar që kurdo që kjo pikë të jetë e gatshme, të sillet në Kuvend dhe të trajtohet pa qenë e përcaktuar si pikë e rendit të ditës mirëpo as ky propozim sipas saj nuk u mbështet.

“I gjithë diskutimi që nga fillimi i kësaj mbledhje ishte që rezoluta e përmendur më herët pra për mbrojtjen e së vërtetës historike të luftës në Kosovë a të jetë pikë e parë e rendit të ditës, a të jetë pikë e fundit të rendit të ditës. Pra për shkak se nuk pati dakordim për këtë çështje nuk arriti që rendi i ditës të miratohet sot. Bëra përpjekje maksimale që të gjindet një konsensus. Nuk pati dakordim sepse kishte një grup parlamentar siç ishte PDK-ja që insistonte që kjo të jetë pikë e parë dhe në anën tjetër nga LVV-ja që kjo të radhitet në fund të rendit të ditës. Unë propozova që kurdo që grupi që mblidhet e përfundon punën, të vijë në seancën dhe ne në çfarëdo pike që jemi e trajtojmë dhe nëse ka dakordancë e votojmë. Sot sërish kishte diskutime të njëjta dhe si rrjedhojë nuk u miratua rendi i ditës”, deklaroi Haxhiu.

Kryeparlamentarja Haxhiu theksoi se në rend dite i kishte paraparë disa pika që ndërlidhen me katër marrëveshje ndërkombëtare të cilat nuk arritën të ratifikohen në seancën e kaluar për shkak të mungesës së kuorumit. Pastaj votimi i propozim-rezolutës për rritjen e çmimit të naftës që kishte një debat në seancën e kaluar. Zgjedhja e një anëtari jo-prokuror në KPK dhe shqyrtimi i propozim-rezolutës për mbrojtjen e së vërtetës historike të luftës në Kosovë.

PDK: Për keqardhje rezistenca e VV-së që rezoluta të trajtohet si pikë e parë në seancë

Deputetja e PDK-së Vlora Çitaku ka thënë se sot ka ndodhur diçka e paprecedent në mbledhjen e  Kryesisë, duke deklaruar se nuk kanë arritur të dakordohen për pikat e rendit të ditës.

Derisa ka folur për rezolutën e propozuar për mbrojtjen e viktimave të luftës, ajo ka thënë se kjo çështje nuk ka qenë politike asnjëherë për ta.

Ajo ka thënë se kërkesë ka qenë nga PDK-ja që rezoluta të jetë pikë e parë e rendit të ditës, por shton se hasën në rezistencë nga Lëvizja Vetëvendosje.

“Kujtesë nuk është vetëm e kaluara, kujtesa është identitet, kujtesa është themeli mbi të cilin ndërtohen institucionet dhe shteti. Pati një rezistencë për mua të paarsyeshme edhe të pashpjegueshme nga anëtarët e Vetëvendosjes. PDK e ka bërë të qartë që marrëveshjet ndërkombëtare i voton, këto s’janë marrëveshje të një partie”, ka thënë ajo.

Shefi i Grupit Parlamentar të PDK-së, Arian Tahiri, e ka quajtur veprim për keqardhje kundërshtimin e Vetëvendosjes që rezoluta të mos trajtohet si pikë e parë e rendit të ditës.

Ka shtuar se megjithëse është teknike renditja e kësaj pike, thekson se është simbol dhe mesazh i vullnetit të  të gjithëve.

Nagavci: Do t’i intensifikojmë veprimet për zgjedhjen e presidentit brenda afatit të Kushtetueses

Photo: Driton Paçarada

Shefja e Grupit Parlamentar të Lëvizjes Vetëvendosje, Arbërie Nagavci, ka thënë pas mbledhjes së Kryesisë, se kryeministri Albin Kurti ka pasur takim me kryetarin e LDK-së, Lumir Abdixhiku, duke shtuar se është duke vazhduar angazhimin maksimal për çështjen e presidentit.

Ka deklaruar se gjatë këtyre ditëve do të intensifikohen veprimet për zgjedhjen e presidentit brenda afatit të cilin e ka dhënë Gjykata Kushtetuese.

“Besoj që gjatë këtyre ditëve do t’i intensifikojë përpjekjet për të gjetur një zgjidhje dhe që presidenti të votohet brenda afatit të Kushtetueses, sepse jemi të bindur që vendit i duhet një president i zgjedhur në Kuvend, sepse zgjedhjet e reja nuk do të sjellin asnjë rezultat tjetër dhe janë të panevojshme”, ka thënë tutje ajo.

Nagavci është shprehur e bindur që Kurti do të “bëjë gjithçka që t’i shmang zgjedhjet”.

Sa i përket rezolutës së propozuar nga PDK-ja për mbrojtjen e viktimave të luftës, ka thënë se që nga dita e parë kanë qenë të gatshëm të kontribuojnë në një tekst të rezolutës, i cili sipas saj, i bën nder Kuvendit dhe paraqet unitet të partive shqiptare në Kosovë dhe komuniteteve joserbe.

Ka deklaruar se ka kërkuar nga PDK-ja që të ftojnë grupin punues që të dakordohen, duke shtuar se kanë propozuar dy deputetë që do të marrin pjesë në këtë grup.

“Besoj që ndoshta jemi vonë për të adresuar një çështje të tillë, por nuk jemi të interesuar që temat që janë me interes të madh të trajtohen si tema parciale”, ka thënë ajo. “Në momentin që kemi një draft të dakorduar nga të gjitha partitë, ne do ta votojmë në seancë”.

Ka shtuar se marrëveshjet ndërkombëtare që do të jenë në seancën e së premtes, janë ato që kanë qenë në seancën e kaluar por që u kërkuan të shtyhen pasi deputetët  nuk e kishin kohën e mjaftueshme t’i trajtonin.

Nagavci duke folur për anëtarët e KQZ-së, ka thënë anëtari i radhës në KQZ duhet të propozohet nga Lëvizja Vetëvendosje.

Tahiri: E mbështesim rezolutën e PDK-së si pikë të parë të rendit të ditës

Photo: Driton Paçarada

Shefi i grupit parlamentar të AAK-së, Besnik Tahiri, ka thënë se të premten do të mbahet seancë dhe janë katër marrëveshje ndërkombëtare për të cilat ka thënë se duhet të votohen. Tahiri ka thënë gjithashtu se debat ka pasur edhe për rezolutën e propozuar nga PDK-ja për mbrojtjen e viktimave të luftës, për të cilën theksoi se AAK-ja ka shprehur mbëeshtjetje që të jetë si pikë të parë e rendit të ditës.

Sipas Tahirit i gjithë debati në kryesi është ndërlidhur me procesin zgjedhor.

Deputeti nga AAK-ja, Tahiri, ka bërë të ditur pas mbledhjes së Kryesisë së Kuvendit të Kosovës, se grupit parlamentar të kësaj partie i është bashkuar deputetja nga pakicat, Duda Balje.

“Në seancën e së premtes janë katër marrëveshje ndërkombëtare. Pati një debat të gjerë rreth rezolutës së propozuar nga PDK-ja. Grupi parlamentar i AAK-së e mbështet që rezoluta të jetë si pikë e parë. Çështja e dytë ka të bëjë me informatën që dua ta bëjë të ditur se deputetja Duda Balje i është bashkuar grupit tonë parlamentar, edhe ajo është në agjendë. Së fundmi ajo që mund të them është që i gjithë debati në kryesi po ndërlidhet me debatin që ndërlidhet me procesin zgjedhor. Shpresoj që kjo tejkalohet dhe të votojmë marrëveshje ndërkombëtare që janë në interes të vendit dhe të qytetarëve”, ka thënë Tahiri.