Ministri i Mjedisit dhe Planifikimit Hapësinor, Fatmir Matoshi, së bashku me sekretarin Arben Çitaku, drejtorin e Departamentit të Inspektoratit, Bedri Halimi, sot janë takuar me drejtorët dhe inspektorët komunalë të Kosovës.
Gjatë këtij takimi, Matoshi i ka njoftuar drejtorët dhe inspektorët komunalë për Udhëzimin Administrativ për Gjoba Mandatore.
“Jemi këtu së bashku, në një takim koordinues, për të lidhur një bashkëpunim nga sot e tutje në zbatim të Udhëzimit Administrativ Nr.6/2018 për ndëshkimet me Gjoba Mandatore për ata që hedhin mbeturina në vendet që nuk janë të lejuara”, tha ministri.
Ai tregoi se Ministria që ai e udhëheqë dhe akterët e tjerë institucionalë, bashkërisht do ta zbatojnë këtë udhëzim në të mirë të qytetarëve dhe mjedisit.
“Jemi të përkushtuar si ministri dhe besoj bashkërisht me komunat dhe Policinë e Kosovës, që ky Udhëzim Administrativ të gjejë zbatim të plotë në gjithë territorin e Republikës së Kosovës”, deklaroi Matoshi.
I pari i MMPH-së, para inspektorëve komunalë tha se janë ata që me vullnet mund ta zbatojnë dhe jetësojnë këtë Udhëzimin Administrativ.
Edhe
Matoshi kërkon nga Kompanitë e Mbeturinave t’i raportojnë keqpërdoruesit e mjedisit
“Udhëzimi Administrativ për Gjoba Mantadore, ka tre mekanizma nga të cilët do të zbatohet. Në rend të parë nga Inspektorët e MMPH-së, Inspektorët komunalë të Mjedisit ose Inspektorët e tjerë të autorizuar si dhe nga Policia e Kosovës. Jemi tre mekanizma që bashkërisht mund ta bëjmë këtë udhëzim të zbatueshëm”, pohoi Matoshi.
Udhëzimi Administrativ për Gjobat Mandatore, parasheh ndëshkime me gjoba mandatore për personat fizikë dhe juridikë të cilët hedhin mbeturina jashtë vendeve të caktuara për hedhjen e tyre.
Vlera e gjobës mandatore, varësisht prej veprimit ndëshkues, do të jetë prej 20 deri në 100 euro.
