Mangësitë e aktgjykimit të Kushtetueses për seancën konstituive

Behane aktgjykimit të Kushtetueses i kanë gjetur edhe ish-gjyqtarë të saj. Vërejtjen lidhen me sanksionet për kryesuesin e seancës, për detyrimin e deputetëve për të votuar dhe për mungesën e listimit të pasojave kushtetuese në rast të moszbatimit të aktgjykimit.

Njohës të Kushtetutës i kanë gjetur mangësi disa pikave të vendimit të Gjykatës Kushtetuese në lidhje me konstituimin e Kuvendit.

Ish-kryetari i Kushtetueses, Enver Hasani, në një intervistë për Evropën e Lirë ka thënë se vërejtjen lidhen me pasojat për kryesuesin e seancës dhe për detyrimin e deputetëve për të votuar.

“Është e çuditshme se si mund të konstatohet shkelja kushtetuese e zotit Avni Dehari dhe i njëjti të urdhërohet të vazhdojë aty ku e ka shkelur Kushtetutën. Kjo nuk mund të arsyetohet me standardet e gjyqësisë kushtetuese. Dhe e dyta, ju e dini, edhe në aktgjykimin e vitit 2014, edhe në atë të para një muaji të Gjykatës Kushtetuese, është thënë se deputetët duhet të rrinë dhe të votojnë, por tani gjykata i urdhëron. Edhe kjo bie ndesh me postulatin e mandatit të lirë dhe besoj se kjo është vështirë e pajtueshme me standardet kushtetuese”, ka thënë ai.

E ish-gjyqtari i Kushtetueses, Kadri Kryeziu, ka konstatuar se me vendimin e ri gjykata e ka rishkruar Kushtetutën.

“Vendimi që e drejta e nominimit të një kandidati të caktuar të kufizohet në tre herë nuk ka bazë në dispozitat materiale të Kushtetutës… Gjykata nuk ka treguar çfarë ndodh pas skadimit të afatit 30-ditor, pra cilat janë pasojat juridike të mosrespektimit të afatit. Po ashtu Gjykata nuk ka treguar çfarë pasojash juridike kanë deputetët që nuk i binden pikës 5 të vendimit, gjegjësisht urdhrit që të jenë të pranishëm dhe të votojnë”, ka thënë ai.

E, hulumtuesi në Institutin Demokratik të Kosovës, Eugen Cakolli, shprehu pritjen që pasojat për deputetët që nuk i binden aktgjykimit, të qartësohen me aktgjykimin që i referohet kërkesës së presidentes Vjosa Osmani.

“Për sa kohë që nuk përcaktohen sanksione, pasoja juridike afate të tilla do të jenë të destinuara për të mos u respektuar nga akterët politikë. Sepse problemi është mungesa e vullnetit politik, jo se paritë nuk e dinë se si duhet të veprojnë apo se si duhet të sillen por mungesë e vullnetit politik për të gjeture zgjidhje qoftë edhe kjo dakordim për të shkuar në zgjedhje që nuk përjashtohet si opsion”, ka deklaruar ai.

Nëpërmjet një kërkese presidentja Vjosa Osmani i kërkoi gjykatës t’i listojë pasojat kushtetuese që prodhohen nëse pas 30 ditëve prej kur nis seanca konstituive, nuk zgjidhet kryeparlamentari dhe nënkryetarët e Kuvendit. Ajo tërhoqi kërkesën, por gjykata ka diskrecion ta shqyrtojë lëndën ose jo.