Komuna e Malishevës thotë se ka nisur sanimin e dëmeve që shkaktuan reshjet e shiut ditëve të fundit.
“Shirat e ditëve të fundit, kanë shkaktuar dëme të konsiderueshme në Komunën e Malishevës, për shkak të vërshimeve si pasojë e sasisë së madhe të ujit. Në disa fshatra, vërshimet kanë shkaktuar dëme të konsiderueshme, duke bllokuar dhe dëmtuar rrugët në masë të madhe”, thuhet në njoftimin për media të Komunës së Malishevës.
Sipas njoftimit, komisioni komunal, është duke bërë vlerësimin e dëmeve, dhe pas kërkesës së komisionit për ndërhyrje urgjente në disa rrugë, sot ka filluar sanimi i dëmeve dhe hapja e rrugëve për qarkullim.
“Fshatrat më të goditura me dëme dhe bllokim të rrugëve janë Kërvasaria dhe Gurishta, dhe për këtë shkak sot ka filluar largimi i sasive të dheut dhe rërës, që kanë bllokuar rrugët. Në vendngjarje, bashkë me bashkë me ekipet përgjegjëse, ishte nënkryetari i Komunës së Malishevës, Hajdin Berisha, ku i ka parë nga afër dëmet e shkaktuara”, thuhet në njoftim.
“Ekipet emergjente dhe ato të kontraktuara nga komuna, kanë filluar pastrimin e rrugëve në këto dy fshatra, pasi rrugët kanë qenë të bllokuara, ndërsa në ditët në vijim do të pastrohen edhe pjesët tjera dhe do të vlerësohen dëmet, pasi komisioni komunal, është duke e bërë identifikimin e dëmeve n terren”, citohet të ketë thënë Berisha.
Përndryshe, këtyre ditëve, sidomos ditën e enjte, janë dëmtuar rëndë rrugët në Gurishtë (Goriq) dhe Kërvasari,, ndërsa në fshatin Dragobil, vetëtima ka djegur kulmin e një ndërtese, përfundon njoftimi i Komunës.
