Komuna e Malishevës, për vitin 2019 ka një buxhet prej 14.5 milionë euro, ndërsa prej tyre 4.3 milionë euro janë të parapara për investime kapitale.
Kështu u tha në dëgjimin e parë publik, në kuadër të dëgjimeve publike për hartimin e buxhetit për vitin e ardhshëm. Dëgjimet publike do të vazhdojnë në ditët në vijim nëpër vendbanime dhe me grupet e interesit.
Sot është mbajtur dëgjimi i parë, ku kanë marrë pjesë kryetarët e fshatrave të Komunës së Malishevës, ndërsa në këtë takim, kryetari i Komunës, Ragip Begaj, i ka ftuar ata që të vazhdojnë të japin kontributin e tyre në hartimin e buxhetit për vitin e ardhshëm, përmes propozimeve të tyre, për orientimin e investimeve në vitet në vijim, me theks të veçantë për vitin 2019.
“Gjatë gjithë këtyre viteve, investimet i kemi bërë duke u bazuar në kërkesat dhe nevojat e juaja, e po ashtu edhe këtë vit do t’i orientojmë investimet në këtë formë duke u bazuar në kërkesat e vendbanimeve”, tha Begaj.
Ndërsa drejtori i Drejtorisë për Buxhet dhe Financa, Valon Mazreku, duke e prezantuar qarkoren e dytë buxhetore, për Kornizën Afatmesme Buxhetore (KAB) 2019-2021, është fokusuar më shumë në ndarjen e buxhetit që i është bërë Komunës së Malishevës për vitin 2019. Sipas tij, buxheti në vitin 2019 do të jetë për dy për qind më i madh se viti paraprak, ku i tërë buxheti do të jetë 14.5 milionë euro, ndërsa për investime kapitale janë të ndara 4.3 milionë euro.
Edhe
Malisheva më 2020 do të ketë 4 milionë euro për investime kapitale
Pas prezantimit të KAB, kryetarët e fshatrave i kanë shfaqur kërkesat e vendbanimeve të tyre për investime, ku kryesisht kanë dominuar kërkesat për infrastrukturë, si kanalizime, ujësjellës, rrugë e trotuare, por edhe për përkrahje në fushën e bujqësisë.
Në këtë takim, është kërkuar nga kryetarët e fshatrave që të jenë aktivë në takimet tjera që do të mbahen nëpër vendbanimet e Komunës së Malishevës, ndërsa kërkesat e tyre t’i paraqesin me shkrim në drejtoritë përkatëse.
