Me maska mbrojtëse, dorëza e qese për të ambalazhuar bukët, në furrën e familjes së Shefki Sali Berishës shërbehet çdo klient.
Këto masa Berisha thotë se janë të rëndësishme për ruajtjen e shëndetit të secilit, ndërkohë që situata e krijuar me pandeminë ka bërë që ata të punojnë me humbje.
Shkak për këtë pronari i furrës ‘’Labi’’ thotë se janë bërë masat dhe daljet e rralluara të qytetarëve, raporton KOHA.
Pasi që problemet e krijuara me miellin në të gjithë vendin nuk e prekën biznesin e tij, Berisha thotë se në këtë kohë e rëndësishme është të kujdesen për të gjithë ata që nuk kanë.
Derisa ka bërë edhe një listë të personave nevojtarë që ai shërben çdo ditë.
Edhe
Puna në furra në kohën e pandemisë
Qëkur u morën vendimet për masat parandaluese nga Ministria e Shëndetësisë, në Drejtorinë e Inspektoratit të Prishtinës thonë se me të gjitha bizneset kanë gjetur gjuhën e përbashkët.
Drejtori i kësaj drejtorie, Adonis Tahiri, tha se secila furrë buke që operon në Prishtinë është duke respektuar urdhëresat e Komunës për parandalim të përhapjes së virusit.
Një tjetër furrë buke që po respekton urdhëresat e Komunës së Prishtinës është edhe ajo e Skënder Agushajt në lagjen “Mati”.
Përveç mjeteve të nevojshme mbrojtëse gjatë punës, pronari i kësaj furre thotë se çdo javë kryen edhe dezinfektimin e hapësirave të punës.
Agushaj tregon se në këtë kohë ka rritur edhe numrin e stafit të punës, ndonëse shtyllë kryesore të biznesit të tij ka familjen e ngushtë.
Ai shprehet se me gjithë gjendjen e krijuar, është vullneti për punën që i ndihmon ata në punën e përditshme.
Edhe
Furrat kosovare s’e ndalin bamirësinë as në kohë pandemie
Që nga përhapja e virusit në vend furrat e bukës janë në mesin e veprimtarive që janë lejuar të punojnë.
Ndërkohë që Komuna e Prishtinës ka përfshirë edhe këto biznese në programin e tyre për grantet, që do të dhurohen në kuadër të pakos emergjente për bizneset, të vetëpunësuarit dhe ndërmarrjet e vogla e të mesme.
