Lipjani pa shërbim të mamografisë

Prej më shumë se dy vjet qytetarët në Komunën Lipjanit po përballen me mungesë të shërbimeve të mamografisë në Qendrën Kryesore të Mjekësisë Familjare.

Kjo si pasojë e një defekti teknik që ka ndodhur në sistemin e aparaturës elektronike, raporton KOHA.

Por, deri më tash, Komuna nuk ka arritur ta rregullojë atë, megjithëse disa herë i ka bërë kërkesë një kompanie private për riparim.

“Aparati i Mamografi në QKMF nuk funksionon për arsyeje se ka një defekt i cili duhet të evitohet, por deri tash nuk kemi pasur mundësi derisa pacientët për momentin po i dërgojmë për ekzaminim të mamografisë në QKUK”, ka pohuar mjeku Haxhi Bytyqi.

Drejtoresha e Shëndetësisë në Komunën e Lipjanit, Merita Bytyqi, ka thënë se kompania që ishte donatore e mamografisë ka pasur obligim edhe punën e mirëmbajtjes, mirëpo ajo nuk është përgjigjur kur një gjë e tillë është nevojitur.

“Drejtori i QKMF-së ka bërë kërkesa disa herë, dhe mendoj se në një të afërt shumë të shpejtë nëse këta nuk përgjigjen, atëherë ta përdorim planin B për ta gjetur një operator tjetër të servisimit në mënyrë që sa më shpejt të vihet në funksion puna e mamografit”, ka deklaruar Bytyqi.

Ajo zotohet se që nga viti i ardhshëm do ta kenë në funksion shërbimin e mamografisë.