LDK-ja kërkon dorëheqjen e Nagavcit

Lidhja Demokratike e Kosovës ka kërkuar që ministrja e Arsimit, Shkencës, Teknologjisë dhe Inovacionit (MASHTI), Arbërie Nagavci, të japë dorëheqje, pas mosblerjes së librave shkollorë.

Anëtarja e Kryesisë së kësaj partie, Jehona Lushaku, deklaroi se Ministria e dorëzuar ka treguar paaftësi pasi Qeveria ka vendosur që përgjegjësinë e blerjes së librave t’ua bartë prindërve.

Lushaku shtoi para mediave të martën se varianti i Nagavcit për blerjen e librave do të jetë më i kushtueshëm, pasi siç tha ajo, kjo do të dëshmohet nga blerja me pakicë.

“Paaftësia e qeverisë për ta menaxhuar buxhetin dhe për t'i kryer obligimet ligjore. Varianti i Ministrisë do të jetë shumë më i kushtueshëm, nga kjo do të dëshmohet se blerja me pakicë do të jetë më e shtrenjtë...Këtu s’po llogarisim edhe angazhimin e prindërve për t’i blerë. Të gjitha këto nuk janë llogaritur. Çmimi i librave do të jetë minimalisht 20 për qind më i shtrenjtë. Kërkojmë dorëheqjen e menjëhershme të ministres Nagavci për shkak të keqmenaxhimit, shkeljeve sistematike të ligjeve në fuqi dhe anarkisë së krijuar në sistemin e arsimit. Kosova nuk meriton një ministre që ka dështuar të menaxhojë çdo nivel të arsimit. Një ministre dhe një Qeveri e tillë është e dëmshme për Kosovën prandaj ikja e saj do të duhej të bëhej menjëherë”, u shpreh Lushaku.

Sipas Lushakut, buxhetimi ka qenë joadekuat, me ç'rast Qeveria ka dështuar të bëjë blerjen e teksteve shkollore.

“Shqetësues është diskursi populist i interpretimit të dështimit të Ministrisë së sigurimin e librave. Nuk mund ta prezantosh si më të favorshme ose kursim të buxhetit një zgjidhje që do t'i kushtojë më shtrenjtë shtetit tonë”, tha ajo.