Lala: Me hyrjen e pakontrolluar të dinarit mund të shantazhohet komuniteti rom në veri

Fridon Lala, deputet i Kuvendit të Kosovës nga radhët e partisë IRDK ka thënë se për çështjen e dinarit, është i nevojshëm koordinimi me aleatët ndërkombëtarë.

Ai ka thënë se komuniteti i tij nuk merr të ardhura nga Serbia, por ka shprehur frikën se me hyrjen e pakontrolluar të dinarit mund të shantazhohet komuniteti rom që është në zonat e komunave veriore.

“Është e nevojshme koordinimi me aleatët por dua të ndalem te një pjesë që ka qarkulluar në media, se me ndalimin e dinarit preken interesat e grupeve të tjera etnike. Si përfaqësues i komunitetit egjiptian, ndalesa e qarkullimit të dinarit nuk prek interesat që ne përfaqësojmë për shkak se komuniteti egjiptian dhe të tjerët nuk janë përfaqësues të skemave të ndryshme që financohen nga qeveria e Serbisë. Por njëherazi kemi ngritur shqetësimet tona se përmes hyrjes se pakontrolluar të dinarit bëhet shantazhimi dhe instrumentalizimi kryesisht i komunitetit rom që gjenden të pambrojtur në zonat e komunave veriore”, ka thënë ai.