Profesori i kriminalistikës, Fatmir Çollaku, e ka cilësuar rast ndryshe prej të tjerëve, çiftin e arrestuar në Kroaci nën dyshimin për spiunazh të Kosovës te Serbia.
Një serbe nga Kosova dhe i dashuri i saj kroat, pilot i KFOR-it, janë dërguar në paraburgim në Kroaci, nën dyshimin se ai i ka dhënë informata për planet e KFOR-it e se ajo ia ka përcjellë Listës Serbe dhe Serbisë.
“Rast më i veçantë nga disa muaj më herët që ishin rastet e zbulimit dhe identifikimit të personave që kanë bashkëpunuar me BIA-n Serbe. Është më i veçantë sepse ka implikim më specifik. Bëhet fjalë për pilot. Pjesëtar të KFOR-it de dallon me zyrtarët e BIA-s e personat tjerë. Dëm i madh edhe Kosovës edhe KFOR-it dhe procedurat e mëvonshme do të shpalosin e do t’i bëjnë publike dëmet që kanë mundur t’ia sjellin Kosovës por edhe KFOR-it”, ka thënë ai në Interaktiv të KTV-së të premten.
E sipas Çollakut, Serbia nuk ka reshtur me përpjekjet për spiunazh në Kosovë që nga paslufta. Madje sipas tij, ka pasur edhe elementë rusë. Ai ka thënë se qëllimet vazhdimisht kanë qenë për të marrë informacione për gjendjen ushtarake dhe situatën në veri.
Këtu ka përmendur barrikadat në veri e pengesat tjera, kryesisht nëpërmjet strukturave paralele serbe në Kosovë. Ai ka thënë se këto struktura e kanë lehtësuar funksionimin e agjentëve që kanë analizuar gjendjen dhe përgatitur terrenin.
Për Banjskën ai ka thënë se ka qenë përpjekje që grupi terrorist serb të mbërrijë tek ura e Ibrit dhe ta bëjë aneksimin e që më pas në bisedime të fitojë, sipas skenarit të tyre, për shkak të epërsisë në terren.
Eksperti i sigurisë ka shpjeguar punën e shërbimeve inteligjente, bazuar në rastet e fundit. Ai ka thënë se shërbimet e kanë vazhdimisht qëllimin që të infiltrohen te institucionet e shtetit në të cilat duan të kenë ndikim.
“Natyra e veprimtarisë inteligjente është e tillë. Shteti A dërgon dhe përgatit agjentët e vet të infiltrohen në shtetin B për interesa të veta, strategjike, ushtarake e të tjera”, ka thënë ai, teksa ka shtuar se qëllimi historikisht mbetet i njëjtë, por se kanë ndryshuar metodat.
Serbja e Kosovës, A.M., që gjendet në paraburgim në Kroaci së bashku me të dashurin e saj, pilotin ushtarak kroat J.I. (54), dyshohet se i ka dërguar mesazhe edhe Vladimir Radivojeviqit, të njohur me nofkën “Mami”, raporton “Index.hr”. Prokuroria Speciale e Kosovës ka ngritur aktakuzë ndaj Radivojeviqit vitin e kaluar, ndërsa dyshohet se është i lidhur me sulmin terrorist në Banjskë të 24 shtatorit të vitit 2023, gjatë të cilit u vra rreshteri policor Afrim Bunjaku.
Në korrik, Policia e Kosovës e arrestoi edhe një serb nën dyshimet për spiunazh. E në qershor, me pesë vjet burgim u dënua për këtë vepër Aleksandar Vlajiq.