Kurti: Serbia të mbahet plotësisht përgjegjëse për sulmet në veri

Kryeministri Albin Kurti ka theksuar se Serbia duhet të mbahet plotësisht përgjegjëse për sulmet ndaj Policisë së Kosovës në veri.

“Këto armë dhe pajisje të gradës ushtarake, të kapura në operacionin antiterror të Policisë së Kosovës pas sulmit të ditës së djeshme, nuk lënë vend për dyshime: Autorët e krimit vepruan jo vetëm, por me mbështetje të shtetit. Serbia duhet të mbahet plotësisht përgjegjëse për sponsorizimin e dhunës terroriste në territorin e Republikës së Kosovës”, ka shkruar Kurti.

Në një postim në rrjetin social X, Kurti ka postuar listën me të gjitha armët që janë konfiskuar në veri si dhe disa fotografi të tyre.

Në sulmet ndaj Policisë së Kosovës në veri, të dielën është vrarë polici Afrim Bunjaku. Nga këto sulme janë lënduar edhe tre policë të tjerë, njëri prej tyre me armë zjarri.

Të vdekur kanë mbetën edhe tre sulmues të armatosur.