Kryeministri i Kosovës, Albin Kurti, është takuar me ministrin e deleguar për Evropën i Republikës së Francës, Benjamin Haddad.
Gjatë takimit Kurti shpalosi planet edhe për vizitën e tij në Paris për Forumin e Paqes në nëntor.
“Kryeministri Kurti theksoi se pas nënshkrimit të pesë marrëveshjeve dhe instrumenteve gjatë vizitës së ministrit Haddad në Kosovë, tani është duke u punuar për zbatimin e tyre, me synim avancimin e bashkëpunimit në drejtësi, arsim dhe sport”, u njoftua nga Zyra e Kryeministrit.
Kurti ka thënë se mbështetja e Francës mbetet e rëndësishme për avancimin e Kosovës drejt anëtarësimit në Këshillin e Evropës dhe Bashkimin Evropian, ka njoftuar Zyra e Kryeministrit.
Po ashtu është diskutuar edhe për dinamikat politike në Ballkanin Perëndimor.
“Ratifikimi këtë muaj nga Kuvendi i kredisë prej 60 milionë eurosh për infrastrukturën e Lojërave Mesdhetare 2030 është një rezultat konkret i këtij partneriteti. Diskutuam gjithashtu për dinamikat politike në rajonin e Ballkanit Perëndimor, duke theksuar që paqja dhe siguria janë të ndërlidhura ngushtë me demokracinë, sundimin e ligjit dhe integrimin evropian”, tha Kurti.