Kryeziu mohon akuzat e Von Cramonit për “propagandë qeveritare”

Zëdhënësi i Qeverisë së Kosovës, Përparim Kryeziu, ka mohuar akuzat e raportueses për Kosovën në Parlamentin Evropian, Viola von Cramon, që përfshiu “propagandën qeveritare” në postimin me të cilin reagoi kundër fushatës në internet ndaj këshilltarit të saj Gjorgje Bojoviq.

Bojoviq ditë më parë u ankua se ndaj tij ka nisur një fushatë, nga robotët e internetit kryesisht nga Kosova, për deklaratën që pati bërë më 2015 për krimet e luftës të kryera në Kosovë. Në mbrojtje të tij pati dalë Von Cramoni që ishte shprehur se këto çështje nuk i ndihmojnë Kosovës dhe eurointegrimit të saj. “Lajmet e rreme, fushatat dezinformuese, propaganda qeveritare... nuk do ta ndryshojnë pozicionin e dikujt, por thjesht do të dobësojnë shanset e Kosovës për të përparuar shpejt. Kjo është e trishtë për vendin”, ka shkruar ajo në platformën X.

Në reagimin e së mërkurës, Kryeziu ka thënë se “Qeveria e Kosovë nuk është përfshirë e as nuk do të përfshihej kurrë në abuzim me pushtetin duke sponsorizuar ‘fushatë të tillë online’”.

“Ne i mohojmë akuzat nga Viola von Cramon, me të cilën komunikojmë rregullisht përmes kanaleve zyrtare. Ne i bëjmë thirrje asaj dhe të tjerëve që të mos mbështesin teoritë e konspiracionit kundër një qeverie demokratike”, ka shkruar ai në Twitter.