Kryetari i Ferizajt kërcënon e fyen një asambleiste

Një ditë pas 8 Marsit, kryetari i Ferizajt, Muharrem Sfarqa, ka ofenduar rëndë një asambleiste. Me fjalët “Ta çkyj gojën po veç je femër”, i pari i kësaj komune iu drejtua anëtares së PDK-së, Kristina Gashi Bytyqi, raporton KTV.

Pas përfundimit të seancës i kërkoi falje për gjuhën e përdorur. Kështu të paktën tregon Mimoza Sojeva Pajaziti, kryetare e grupit të grave asambleiste në Kuvendin Komunal të Ferizajt, e cila bashkë me gratë e tjera të Kuvendit të Ferizajt, do të protestojnë të enjten para komunës. Sipas saj, gjuha e përdorur nga kryetari Sfarqa, është kërcënuese dhe fyese. Kryetari Muharrem Sfarqa, gjatë tërë ditës ka qenë i pakontaktueshëm për të folur për këtë rast.As vetë protagonistja Kristina Gashi Bytyqi, nuk ka parapëlqyer të flas para kamerës.