Frashër Krasniqi, ish-aktivist dhe ish-deputet i Vetëvendosjes, tash deputet i PSD-së i është kthyer arkivit. Ka shkëputur pjesë nga një mbledhje e Këshillit të Përgjithshëm të Vetëvendosjes, të vitit 2016.
Bashkë me video, Krasniqi ka thënë se Kurti as nuk ka pasur e as nuk do të ketë vija të kuqe për PDK-në. Ish partisë së tij i ka dërguar porosi se “nëse vazhdoni kështu, duhet t'i publikojmë të gjitha faktet e mbledhjeve që kanë të bëjnë me ndarjen tonë”.
Në video flet edhe Molliqaj, që nuk pajtohet me Kurtin. Videoja nuk është e plotë dhe te fjalimi i Kurtit vërehet që është shkëputur disa herë.
Kurti, në paraqitjet e tij publike, kishte deklaruar se Vetëvendosje do të mund të bënte koalicion me PDK-në atëherë kur në krye të saj nuk do të ishin Hashim Thaçi e Kadri Veseli.
Më poshtë mund të lexoni të plotë postimin e Krasniqit
VIDEO NGA KËSHILLI I PËRGJITHSHËM I VV, VITI 2016. ALBIN KURTI REFUZON QË VV TË KETË VIJA TË KUQE PËR PDK.
Ne gjithmonë kemi pasur vija të kuqe ndaj PDK-së. Do të kemi edhe më tutje, dhe koha do ta dëshmojë këtë. Albin Kurti as nuk ka pasur dhe as nuk do të ketë. Veç mos i ardhtë rasti se keni me u çuditë qysh ka me u arsyetu që "PDK tash ka ndryshuar, nuk është e njëjta, etj.", ashtu siç përpiqet me arsyetu në këtë video.
Merruni me veten sepse askush nuk është duke ju kuptu qysh mundet një subjekt "kaq serioz" me u marrë 90% të kohës me një subjekt "të vogël" e "joserioz".
I keni lodhë qytetarët tu shpifë, tu akuzu, tu qitë fall e tu vajtu. Ndaluni ma e mos na detyroni me ua shpërfaqë fytyrën e vërtetë. Mos te banalizojmë çdo debat, sepse nëse vazhdoni kështu, duhet t'i publikojmë të gjitha faktet e mbledhjeve që kanë të bëjnë me ndarjen tonë.
