Kryetari i Partisë Demokratike të Kosovës, Memli Krasniqi, e ka cilësuar historik rezultatin e kësaj partie në zgjedhjet parlamentare të 9 shkurtit.
PDK-ja doli e dyta me 20.95 për qind, apo 196 mijë e 474 vota. E para doli Lëvizja Vetëvendosje me mbi 42 për qind.
PDK-ja përjetoi rritje prej rreth 50 mijë votash.
“Faleminderit! Kjo është fjala e parë dhe më e sinqertë që e ndjej t’ua them pas përfundimit të numërimit të votave. Faleminderit për besimin e rreth 200 mijë qytetarëve që na mbështetën në zgjedhjet e 9 shkurtit. Garuam me kandidatin, vizionin dhe listën më të mirë për Kosovën. Prezantuam projektin më të duhur për zhvillimin e vendit. Dhe u rritëm – me 50 mijë vota më shumë se në zgjedhjet e fundit, një rezultat historik për partinë tonë”, ka shkruar ai në Facebook pasi KQZ-ja shpalli rezultatet përfundimtare.
Krasniqi ka thënë se PDK-ja nuk e ka mbërritur maksimumin e saj.
“Tani nis akti tjetër – ku me të njëjtën energji dhe përkushtim, ecim përpara! Pas fitores sonë në zgjedhjet lokale, ky është një tjetër hap drejt rikthimit të madh”, ka shtuar ai.
Edhe
Krasniqi: Tahiri, i vetëm përballë aparatit shtetëror, bëri një garë të fortë e dinjitoze
Krasniqi në fund ka deklaruar se Kosova ka nevojë për qartësi, stabilitet dhe zhvillim. Ai ka thënë se e nevojshme është një qeveri e përgjegjshme sa më shpejt “sepse ka nevojë për shpresë dhe besim”.
“Ka nevojë për miq, partnerë dhe aleatë – sepse asnjëherë, e veçanërisht sot, koha nuk pret për ata që hezitojnë. Prandaj, çdo parti që ka marrë votën e qytetarëve duhet ta përkthejë atë në veprim, duke e vënë në shërbim të interesit qytetar”, ka thënë ai.
