Kostoja e proceseve zgjedhore më 2025 mund të arrijë në 28 milionë euro

Rreth 28 milionë euro mund të kapë fatura totale e të gjitha proceseve zgjedhore që do të mbahen gjatë vitit 2025 në Kosovë. Brenda pak ditësh, Komisioni Qendror i Zgjedhjeve (KQZ) pritet t’ia dërgojë Qeverisë kërkesën buxhetore për organizimin e zgjedhjeve të parakohshme parlamentare, të caktuara për 28 dhjetor 2025.

Ndonëse KQZ-ja ende nuk e ka bërë publike shumën e saktë të planifikuar për këto zgjedhje, përllogaritjet paraprake sugjerojnë se kostoja mund të jetë e ngjashme me zgjedhjet parlamentare të mbajtura më 9 shkurt, çka do ta çonte shpenzimin total të këtij viti zgjedhor në rreth 28 milionë euro, ku përfshihet edhe organizimi i zgjedhjeve lokale në dy runde.

Zëdhënësi i KQZ-së, Valmir Elezi, ka thënë se për zgjedhjet e 9 shkurtit ishin planifikuar 8.7 milionë euro, ndërsa deri tani janë shpenzuar rreth 7.9 milionë euro. Për zgjedhjet lokale të 12 tetorit, të cilat përfshijnë edhe rundin e dytë, ishin planifikuar mbi 10.5 milionë euro. Raporti përfundimtar i shpenzimeve për këto procese është ende në përgatitje.

“KQZ-ja nuk ka mjete të planifikuara për një proces të ri zgjedhor që nuk ka qenë pjesë e buxhetit vjetor. Në mbledhjen e radhës pritet të miratohet planifikimi buxhetor për zgjedhjet e 28 dhjetorit, ndërsa kërkesa për buxhet do t’i përcillet Qeverisë për miratim”, ka thënë Elezi për “Ekonomia Online”.

Ai shtoi se Ligji i ri për Zgjedhjet e Përgjithshme ka zgjeruar përgjegjësitë e KQZ-së, gjë që ka ndikuar edhe në rritjen e kostos së planifikuar. Pjesa më e madhe e mjeteve shpenzohen për pagesat e trupave zgjedhore dhe stafit të angazhuar përgjatë gjithë procesit zgjedhor.