Prishtinë, 30 gusht - Ministri i Ministrisë së Punëve të Brendshme, z.Bejtush Gashi, po qëndron në një vizitë zyrtare në Austri.
Sipas njoftimit për media, ai është pritur nga sekretari i përgjithshëm i Ministrisë së Punëve të Brendshme të Austrisë, z.Peter Goldgruber, me të cilin ka biseduar për çështje që lidhen me migrimin, terrorizmin dhe ekstremizmin e dhunshëm, pastaj për liberalizimin e vizave si dhe për përfshirjen e Policisë së Kosovës në Interpol.
“Shfrytëzojmë nga rasti të ju falënderojmë për përkrahjen e madhe që Austria i ka dhënë popullit të Kosovës dhe presim që përkrahja juaj të vazhdojë për liberalizimin e vizave, në procesin e anëtarësimit të Kosovës në Interpol dhe organizatat e tjera ndërkombëtare, si dhe për perspektiven Kosovës në Bashkimin Evropian”, citon njoftimi ministrin Gashi.
Siç është shprehur ministri Gashi, terrorizmi dhe ekstremizmi i dhunshëm vazhdojnë të mbeten një nga kërcënimet kryesore të sigurisë, një kërcënim jo vetëm për jetën dhe pronën, por edhe për vlerat demokratike dhe vetë mënyrën e jetës së shoqërisë. Qeveria e Kosovës dhe institucionet e saj mbeten të përkushtuara për të dhënë ndihmën e tyre për t’i luftuar këto fenomene.
Në lidhje me rekomandimin e Komitetit për Liritë Qytetare, Drejtësi dhe Çështje të Brendshme - LIBE, ministri Gashi shprehu se MPB do të mbetet e përkushtuar në menaxhimin efikas të procesit pas liberalizimit të vizave dhe obligimeve që dalin nga lëvizja e lirë në zonën Schengen.
Gjithashtu tha se anëtarësimi i Kosovës në Interpol është i domosdoshëm për të garantuar dhe forcuar sigurinë dhe stabilitetin në rajon dhe më gjerë.
Edhe
Austria mbështet Kosovën për anëtarësim në Interpol
Në anën tjetër, sekretari i përgjithshëm i Ministrisë të Punëve të Brendshme të Austrisë, z.Peter Goldgruber konfirmoi mbështetjen e shtetit austriak në përmbushjen e objektivave në proceset e integrimit euro-atlantik.
Goldgruber ofroi gatishmërinë për bashkëpunimin në mes të dy policive, sa i përket shkëmbimit të informatave, të cilat do të ndihmonin në luftimin e terrorizmit dhe krimit të organizuar, saktësohet në njoftim.
