Kosova e di se ka shumë punë për të bërë në sistem të drejtësisë, thotë Tahiri

Ministri i Drejtësisë, Abelard Tahiri, ka thënë se Kosova ka ende shumë punë për të bërë në përmirësim të sektorit të drejtësisë, por ka shtuar se ka shpresë që drejtësia në Kosovë ka të ardhme.

Gjatë adresimit para homologëve në Forumin Ministror BE-Ballkani Perëndimor për Drejtësi dhe Punë të Brendshme, të organizuar nga Presidenca Austriake e Këshillit të Bashkimit Evropian, që po mbahet në Tiranë, Tahiri theksoi se i gjithë regjioni është në përmbyllje të tranzicionit dhe po bën progres sidomos në përmirësimin e sektorit të drejtësisë.

“Si Ministër i Drejtësisë së Kosovës, jam plotësisht i vetëdijshëm se kemi nevojë për përmirësimin e kualitetit të drejtësisë. Andaj kam ndërmarrë hapa të rëndësishëm dhe reforma të rëndësishme ligjore, për të rritur qasjen në drejtësi, efikasitetin, transparencën dhe përgjegjshmërinë e sektorit të drejtësisë”, ka thënë Tahiri.

Sipas njoftimit, Tahiri ka përmendur ndryshimet konkrete ligjore të bëra gjatë një viti të mandatit të tij. Sipas tij, ndryshime në këtë sektor pritet të bëhen edhe me përmes reformës së ndërmarrë të Rishikimit Funksional të Sektorit të Sundimit të Ligjit, si dhe agjendës së përbashkët me Këshillin Gjyqësor dhe atë Prokurorial, “Drejtësia 2020”.

“Reformat që kemi ndërmarrë na japin shpresë se drejtësia jonë ka një të ardhme dhe ne jemi të përkushtuar për të parë që kjo e ardhme të ndodh tani. Por ne kemi ende shumë punë për të bërë. Realiteti nganjëherë nuk na ndjek ashtu si e presim. Shumë sondazhe tregojnë se qytetarët nganjëherë nuk besojnë në gjyqësor, si shtylla më e rëndësishme e sistemit të drejtësisë. Andaj, me këto reforma kemi dëshmuar se kemi vullnet të ballafaqohemi me këto sfida, për të avancuar sundimin e ligjit, luftën kundër korrupsionit dhe krimit të organizuar, për të përmirësuar qasjen në drejtësi dhe për të mundësuar shërbime të mira gjyqësore për qytetarët tanë”, ka deklaruar ai.