Kosova dëshiron ambasadë në Varshavë

Zëvendësministrja e Jashtme e Kosovës, Rejhan Vuniqi, ka thënë se Kosova ka shprehur interesim të vendosë marrëdhënie diplomatike me Poloninë dhe dëshiron hapjen e ambasadës së Kosovës në Varshavë.

Ajo gjatë pritjes që i bëri një delegacioni shtetëror polak, të kryesuar nga Sekretari i Shtetit në Ministrinë e Punëve të Jashtme të Polonisë, Szymon Szynkowski vel Sek, ka thënë se Polonia mbetet aleat strategjik në Evropë.

“Siç ka theksuar edhe Ministri Pacolli, vendosja e themeleve solide në lidhjet politike dhe ekonomike midis Kosovës dhe Polonisë janë dy nga prioritetet e Kosovës. Avancimi i marrëdhënieve bilaterale midis Kosovës dhe Polonisë është në përputhje të plotë me parimin e politikës së jashtme të Polonisë për të mbështetur integrimin e rajonit në strukturat euroatlantike dhe për të mbështetur paqen dhe stabilitetin në Ballkanin Perëndimor”, është shprehur Vuniqi.

Në kuadër të këtij takimi është diskutuar edhe mbi agjendën evropiane, respektivisht zbatimin e Marrëveshjes së Stabilizim Asocimit (SAA), marrëveshjes Kosovë-BE mbi programet e BE-së, liberalizimin e vizave, procesin e Berlinit, Dialogun me Serbinë, ndërkohë që është kërkuar edhe mbështetja e shtetit polak për anëtarësimin e Kosovës në INTERPOL.

Qëllimi i kësaj vizite zyrtare të delegacionit të lartë të shtetit polak në vend ishte fillimi i përgatitjeve të Samitit të ardhshëm të Ballkanit Perëndimor, i cili vitin e ardhshëm do të mbahet në Poznan të Polonisë.