Koretini e Topanica, fshatrat e radhës që e refuzojnë reformën e arsimit në Kamenicë

Derisa nxënësit presin para dyerve të shkollës “Abdullah Krashnica” për të filluar mësimin, klasat e kësaj shkolle në fshatin Koretin të Kamenicës, janë të zbrazura.

Kjo për shkak se në këtë shkollë mësimi nuk u mbajt pas refuzimit të prindërve të fshatrave Koretin e Topanicë, për të respektuar reformën arsimore në këtë komunë, raporton KTV.

Sipas prindërve të fshatit Koretin, reforma e vendosur nga Komuna e Kamenicës i dëmton ata dhe rrezikon fëmijët e tyre, ndërsa kanë nënshkruar edhe një peticion për ndërprerjen e reformës.

Ndonëse nga komuna u angazhua autobusi për bartjen e fëmijëve në të dyja fshatrat, në shkollën e Koretinit, nuk erdhi asnjë prej nxënësve të shkollës “Rexhep Mala”.

Sipas Merita Keqmezit - Drejtoreshë e SHFMU “Abdullah Krashnica” në Koretin, në shkollë përveç nxënësve që nuk erdhën, refuzoi të vijë edhe stafi i mësimdhënësve nga Topanica.

Ndërsa, drejtori i shkollës “Rexhep Mala’’ të Topanicës, Qazim Morina, nuk ka pranuar të flasë para kamerës për këtë refuzim.

Edhe Arbëri 14 sht 2020 Nxënësit bojkotojnë mësimin në Kamenicë kundërshtojnë Komunën dhe Ministrinë

Me gjithë kundërshtimin e reformës nga ana e prindërve, Drejtoria e Arsimit në Komunën e Kamenicës përmes një përgjigjeje i kanë thënë KTV-së se ajo nuk do të tërhiqet, derisa do të merren masa edhe për mësimdhënësit e Topanicës.

“Ne nuk tërhiqemi nga asnjë veprim e vendim që bëhet në dobi të nxënësit. Ligjërisht, ndjekja e mësimit të obligueshëm është përgjegjësi kryesore e prindit. Prandaj, ftojmë prindërit të reflektojnë dhe ta zbatojnë vendimin e Komunës. Sa i përket mësimdhënësve, ne do të marrim masa të menjëhershme siç edhe parashihet ligjërisht dhe nuk do të presim sikur në rastin e mëparshëm. Me vetë Kontratën Kolektive parashihet që për tri ditë mungese nga puna pa arsye, marrëdhënia e punës ndërpritet”, ka thënë Mirhane Morina, nga Drejtoria e Arsimit në Kamenicë.

Reforma e arsimit në Komunën e Kamenicës filloi me 1 shtator të 2019-s, mirëpo u kundërshtua që nga fillimi prej shumicës së banorëve të fshatrave që u prekën nga kjo reformë.