Mbi dhjetë studentë, kandidatë për Doktoraturë në Fakultetin Juridik, mund t’i nënshtrohen që nga fillimi procedurave për aplikim, pasi konkursi për vitin 2019-2020 mund të anulohet.
Komisioni për pranimin e studentëve ka kërkuar nga Senati i Universitetit të Prishtinës anulimin dhe rishpalljen e tij, me arsyetimin se ka pasur pengesa procedurale, tejkalim të afateve procedurale dhe mungesë të kuorumit, raporton KTV.
Kryetarja e këtij komisioni, Iliriana Islami, dhe dekani i fakultetit, Haxhi Gashi, nuk kanë dashur të flasin para kamerës, por kanë kërkuar që të merret si përgjigje raporti i komisionit.
E, në këtë raport, një ndër arsyet për anulimin e konkursit është dorëheqja e profesorit Visar Morina.
Morina ka thënë për KTV-në se u tërhoq nga komisioni pasi kishte konsideruar se përbën konflikt interesi me njërin nga kandidatët, e që, sipas tij, nuk mund ta dinte paraprakisht se i njëjti person do të kandidonte.
“Me qëllim të mbarëvajtjes së procesit dhe sqarimit të situatave të tilla, kur konkurrojnë kandidatë të afërt si mësimdhënës në programet ku kanë konkurruar, dekani i Fakultetit ka dërguar shkresë në Agjencinë Kundër Korrupsion për të sqaruar konfliktin e interesit në raste të tilla. Përgjigjja ende nuk është kthyer nga Agjencia. Për shkak të ndryshimeve në Komision, në ndërkohë, Enver Hasani nga Katedra Ndërkombëtare, deklaroi dorëheqjen e parevokueshme, pasi që ndryshimet në komisione po zhvillohen pasi ka filluar zbatimi i konkursit”, thuhet ndër të tjera në raportin e Komisionit.
Edhe
Shtyhet provimi pranues për doktoratë, dyshime për konflikt interesi
Kjo ka shkaktuar pakënaqësi te kandidatët, disa prej të cilëve në kushte anonimiteti kanë thënë për televizionin se është e papranueshme të kalojnë procedurat e njëjta sërish.
Në Rektoratin e UP-së kanë konfirmuar të kenë pranuar raportin dhe kërkesën për rishpalljen e këtij konkursi.
Prorektori Hysen Bytyqi ka thënë se raporti do të shqyrtohet nga rektori dhe Senati, i cili edhe do të vendosë për konkursin.
