Konfirmohen dy raste me variantin Delta në Kosovë

Janë konfirmuar dy raste me variantin Delta të koronavirusit në Kosovë, variant që së pari është zbuluar në Indi. 

Lajmin e ka bërë të ditur Ministria e Shëndetësisë. Nga 22 mostra sa janë testuar në Institutin e Virologjisë në Klinikën Universitare Charite në Berlin, dy kanë rezultuar me variantin Delta. MSH-ja ka njoftuar se personat kanë shfaqur simptoma, por janë shëruar tashmë e gjenden në shtëpi. 

“Sot kemi pranuar të dhënat nga 22 mostrat pozitive të dërguara në Institutin e Virologjisë të Klinikës Unversitare Charite në Berlin, prej të cilave janë identifikuar 2 (dy) mostra me variantin Delta (B.1.617.2) të SARS-CoV-2. Të dy rastet kanë shfaqur simptoma, mirëpo tashmë janë shëruar dhe gjenden në shtëpi. Izolimi i tyre ka përfunduar. Ekipet e IKSHPK-së tashmë kanë gjurmuar të gjitha burimet dhe kontaktet e mundshme për të parandaluar përhapjen e mëtutjeshme të rasteve”, thuhet në njoftimin e MSH-së.

Varianti Delta po vlerësohet më ngjitës dhe nëpër botë kanë filluar të përhapen raste me variantin e ri.

“Varianti Delta u detektua për herë të parë në Indi në dhjetor të vitit 2020, i cili sot është njëri prej varianteve më brengosës në rruzullin tokësor. Hulumtimet e gjertanishme sugjerojnë se mund të jetë varianti që përhapet më së shpejti edhe më ngjitës sesa Alpha (U.K/B.1.1.7). Masat parandaluese janë të njëjta. Individët të cilët rezultojnë pozitiv duhet të qëndrojnë në shtëpi për të parandaluar përhapjen në familje dhe në komunitet. Me zvogëlimin e kontakteve, do të mundësohet ndërprerja e përhapjes së infeksionit. IKSHPK përsërit thirrjen për zbatimin e të gjitha masave të përgjithshme dhe specifike për mbrojtjen nga pandemia COVID-19 dhe zbatimin e masave të Qeverisë së Republikës së Kosovës”, thuhet nga MSH.

MSH ka bërë thirrje të evitohen grumbullimet, të testohen qytetarët që kanë simptome, e të mbahen maskat si dhe të shmangen turmat në hapësira të mbyllura.