Komuna i ka paditur 23 prindër në Kamenicë, që i detyruan fëmijët në bojkot të mësimit

Drejtorë shkollash, asamblistë në Kuvendin komunal të Kamenicës e zyrtarë të tjerë publikë janë paditur nga Komuna, sepse ua kanë ndalur fëmijëve të tyre vijimin e mësimit.

Afrim Dervishi, asamblist i Lëvizjes Vetëvendosje, është njëri nga prindërit që Drejtoria e Arsimit e Komunës së Kamenicës e ka paditur, raporton KTV.

Ai thotë se ende nuk ka pranuar ndonjë shkresë, megjithatë kjo padi ka të bëjë me kundërshtimin e reformës në arsim në këtë komunë.

Por masat ligjore ndaj tij nuk ia kanë ndryshuar qëndrimin kundër reformës në arsim.

Afrim Dervishi, që është edhe mësimdhënës në shkollën “Abdullah Krashnica – Presheva” në fshatin Koretin, e nuk është i vetmi që është paditur nga Komuna e Kamenicës.

Janë edhe 22 prind të tjerë të cilëve u është ngritur padi për arsyen se fëmijët e tyre nuk e vijojnë mësimin për më shumë se dy javë.

Sipas kryetarit të Kamenicës, Qëndron Kastrati fillimisht janë paditur prindërit që mbajnë poste publike.

Edhe Arbëri 17 maj 2021 Kreu i Kamenicës kërkon dorëheqjen e mësimdhënësve që s’i respektojnë reformat

Megjithëkëtë, disa prej shkollave tashmë kanë hyrë në javën e katërt të bojkotit të mësimit, si kundërshtim i reformës në arsim të filluar nga Qëndron Kastrati.

Ndërkaq sipas Ligjit për arsimin parauniversitar, që është i detyrueshëm, neni 15, pika 4 thotë që prindërit konsiderohet se kanë shkelur ligjin në rast se pa ndonjë arsye nuk regjistrojnë fëmijët në shkollë, nëse ata nuk vijojnë shkollimin ose e ndërpresin shkollimin e detyruar dhe nëse mungesa është rezultat i veprimit të paramenduar ose i neglizhencës së prindërve.

Në raste të tilla, Komuna gjithashtu duhet ta njoftojë Ministrinë me shkrim për veprimet e prindërve.