-
Nga:
Vlerë Mehmeti
- 13 korrik 2024 21:15
- Shpërndaje në:
Prej afro dy javësh, qëkur në QKUK u funksionalizua aparatura që e bën skanimin e detajuar të trupit për identifikimin e qelizave kancerogjene, Klinika e Mjekësisë Nukleare është përballur me fluks të pacientëve. Aty, sipas menaxhmentit, deri më tash u trajtuan afro 30 pacientë. Por numri i atyre që mund ta marrin këtë shërbim brenda një jave është i kufizuar në 5, për shkakun e furnizimit të limituar me materialin e nevojshëm radioaktiv dhe të mungesës së stafit
Kërkesat e shumta të pacientëve për t’iu nënshtruar një incizimi përmes PET CT-së në QKUK kanë ndikuar që në Klinikën e Mjekësisë Nukleare të krijohet listë e pritjes deri në gusht.
Që nga 25 qershori, kur në QKUK nisi që të ofrohet për herë të parë skanimi i detajuar i trupit për identifikim të qelizave kancerogjene, trajtim kanë marrë afro 30 pacientë.
Drejtori i Klinikës, Fakir Spahiu, thotë se brenda një jave mund të trajtohen vetëm 5 pacientë, shkaku i kufizimit në furnizim me material radioaktiv nga prodhuesi.
“Ne jemi të njoftuar që 3 muajt e parë do të furnizohemi vetëm një herë në javë, pas tre muajve ne do të bashkëpunojmë dhe do të kontaktojmë me njëri-tjetrin që ne në të ardhmen do ta rrisim gradualisht furnizimin me material radioaktiv, i cili vjen nga Turqia”, ka thënë Spahiu.
Krahas materialit, Klinika përballet edhe me mungesë të stafit.
Drejtori Spahiu thotë se është në pritje të angazhimit të dy specializantëve e katër teknikëve të rinj.
Që pas funksionalizimit të PET-CT-së, Klinikat e QKUK-së më nuk mund të lëshojnë raport konzilar për kryerjen e këtij shërbimi jashtë vendit apo në ndonjë institucion privat. Bazuar në raportin vjetor të punës së Fondit për Sigurime Shëndetësore, referimet nga Klinika e Mjekësisë Nukleare më 2023 patën shënuar rritje për 166 raste, në krahasim me vitin paraprak.
“Aplikimet sipas klinikave, në periudhën janar-dhjetor të vitit 2023 në raport me periudhën e njëjtë të vitit 2022. Klinika e Mjekësisë Nukleare gjatë vitit 2022 ka 71 aplikime, ndërsa 237 aplikime gjatë vitit 2023. Diferenca 166”, thuhet në raport.
Lidhur me këtë rritje të rasteve, KOHA i adresoi pyetje Fondit, por nuk mori përgjigje.
E Spahiu tha se numri është rritur, për pasojë, që nga viti 2022, kërkesat e të gjitha klinikave i janë referuar asaj Nukleare që ai e drejton.
Deri sivjet, pacientët që kanë pasur nevojë për skanim të detajuar me PET CT, kostoja e së cilës e kap vlerën e 1 mijë e 400 eurove, i janë drejtuar një institucioni privat apo janë referuar jashtë shtetit.
