Ushtruesi i detyrës së kryetarit të OVL-UÇK-së, Faton Klinaku, ka reaguar pasi që dëshmitarja e parë e Prokurorisë në procesin gjyqësor në rastin kundër ish-krerëve të UÇK-së është duke dëshmuar në seancë të mbyllur.
“Pak po ju duket që i fshihet fytyra dhe zëri dëshmitares, veç edhe kalojnë në seancë edhe më private”, ka shkruar Klinaku në Facebook.
Të martën në Hagë ka filluar dëgjimi i dëshmitares së parë të Prokurorisë në Dhomat e Specializuara. Dëshmia e saj po zhvillohet në seancë të mbyllur.
Gjykatësi ka njoftuar se gjatë kësaj jave do të dëgjohen dëshmitë e dy dëshmitarëve, ku fillimisht do të ketë mundësi Prokuroria të parashtrojë pyetje, e pastaj mbrojtja.
Gjykimi ndaj ish-krerëve të UÇK-së, Hashim Thaçi, Kadri Veseli, Rexhep Selimi dhe Jakup Krasniqi, ka filluar javën e kaluar.
