Bordi i Radio Televizionit të Kosovës ka shpallur konkurs për drejtor të Përgjithshëm.
Në këtë konkurs, kërkohet që kandidati që synon të bëhet drejtor i RTK-së, duhet të ketë përvojë 7-vjeçare në menaxhim të mediave, raporton KTV.
Kjo nuk parashihet me Ligjin aktual të transmetuesit publik, por ky kriter është përcaktuar nga bordi drejtues i këtij mediumi.
Këtë e ka thënë përmes një përgjigjeje me shkrim, kryetarja e Bordit të RTK-së, Afërdita Maliqi.
“Bordi i RTK-së ka hapur konkursin publik, duke u bazuar në ligjin aktual të RTK-së. Në këtë ligj, nuk përcaktohet sa vjet duhet të jetë përvoja, pra i mbetet bordit të vendosë për kriterin e përvojës. Duke qenë se po bëhen gati 20 vjet nga paslufta, bordi unanimisht ka vendosur që drejtori i ardhshëm të ketë përvojën e duhur për këtë pozitë kaq të rëndësishme”, ka thënë Maliqi.
Anëtarët e Komisionit Parlamentar për Media, që mbikëqyrin punën e këtij bordi, nuk e konsiderojnë këtë si shkelje ligjore.
Shoqëria civile kërkon që të ketë transparencë të plotë në zgjedhjen e drejtorit të transmetuesit publik.
Jeton Mehmeti nga Instituti GAP ka kërkuar që përzgjedhjen e drejtorit të RTK-së, ta mbikëqyrë Ambasada Britanike. Por, Bordi i transmetuesit publik thotë se nuk kanë marrëveshje ose memorandum me Ambasadën Britanike për këtë proces.
Sipas Ligjit aktual për RTK-në, Drejtori i Përgjithshëm i këtij mediumi emërohet dhe shkarkohet me 2/3 e votave të anëtarëve të Bordit.
Mandati i tij parashihet të jetë tre vjet, me mundësi të rizgjedhjes në bazë të konkursit, vetëm edhe për një mandat pasues. Por, ky kushtëzim është larguar në këtë konkurs.