Pas rreth 2 vjet pritjeje, është mbajtur seanca e parë dhe e fundit dëgjimore për padinë që Shaban Kelmendi ka ushtruar ndaj Ministrisë së Punës dhe Mirëqenies Sociale.
Kjo ministri nuk i pat lejuar Kelmendit qasjen në dokumentet e pensionistëve deri në vitin 1998, i cili i pat kërkuar si i autorizuar i Federatës Sindikale të Pavarur të Pensionistëve të Kosovës.
Por, në gjykatë munguan të paditurit, zyrtarë të ministrisë.
Të njëjtët i kanë thënë KTV-së, nëpërmjet telefonit, se nuk e kanë parë të arsyeshme pjesëmarrjen.
Kelmendi ishte ndër tre pensionistët e parë që ka arritur t’i fitojë paratë që Serbia ua kishte marrë pensionistëve të Kosovës, nëpërmjet Gjykatës së Strasburgut.
Edhe
Qe 5 muaj Ministria e Punës nuk zbaton vendimin e Gjykatës rreth listave të pensionistëve
“Unë po pres që të merret vendimi, nëse jo do t’i thërras të gjithë pensionistët që të shkojnë t’i marrin në ministri dokumentet e veta. Unë do të pres vetëm deri më 1 mars. Nëse nuk merret vendimi pozitivisht, do t’i thërras të gjithë. Krejt është e kryer, vetëm duhet të aplikojnë”, ka thënë Kelmendi.
Në ministri thonë se arsyeja pse nuk ia dhanë Kelmendit dokumentet qëndron te mbrojtja e të dhënave personale.
Sipas tyre, Kelmendi nuk ka pasur autoritet të mjaftueshëm për t’i përdorur këto dokumente.
“Ju kujtojmë se realizimi i të drejtave për pensionistët në raportet Kosovë- Serbi duhet të bëhet nga një autoritet i autorizuar e kurrsesi nga individët”, thuhet në përgjigjen Bahri Xhaferit, udhëheqës i Departamentit të Pensioneve.
Mirëpo, ndryshe kishte thënë ministri Reçica për KTV-në në fundin e vitit të kaluar.
Edhe
Pensionisti që fitoi betejën ndaj Serbisë për pensionet, synon ta bëjë këtë edhe për të tjerët
Sipas Kelmendit, shteti i Kosovës po gabon që çështjen e pensioneve synon ta diskutojë me Serbinë në Bruksel, pasi që vendimet e Gjykatës së Strasburgut nuk kanë nevojë të diskutohen.
Ndërsa, nëse Kelmendi ka të drejtë apo jo, do të vendosë Gjykata Themelore në Prishtinë, në fillim të muajit mars.
