Katër të kafshuar nga qentë endacakë për një muaj në Pejë

Eroll Muhaxheri nga Peja, brenda një muaji dy herë është sulmuar nga qentë endacakë në qendër të qytetit, derisa po shkonte në mëngjes në punë.

“Është e dyta herë që po sulmohem nga qentë derisa po shkoj në punë. Herën e parë më kanë rrëzuar në tokë, por nuk më kanë kafshuar, kurse tash herën e dytë u kafshova në këmbë nga një qen i madh në korzo, mu përballë objektit të Komunës”, tregon Muhaxheri për rastin që i ka ndodhur dhe për çka i është dashtë të trajtohet në spital, shkruan sot Koha Ditore.

Ai thotë se shqetësim ka posaçërisht për vajzat e tij që çdo ditë kalojnë së njëjtës rrugë për në shkollë.

“Unë jam i rritur dhe e përballoj edhe psikikisht më lehtë, por vajzat e mia dhe fëmijët e tjerë nga frika e kafshimit përjetojnë edhe trauma që mund t’i përcjellin deri vonë”, shpreh ai shqetësimin e tij.

Ai nuk ka qenë qytetari i vetëm që është kafshuar gjatë këtij muaji nga qentë në Pejë. Besnik Ibraj, shefi i Urgjencës në Spitalin e Përgjithshëm të Pejës, konfirmoi për “Kohën Ditore” se gjatë këtij muaji kanë qenë katër raste të kafshimit nga qentë endacakë, që janë trajtuar në Urgjencën e Spitalit.\Ilir Osmanaj.

(Artikullin e plotë mund ta lexoni sot në “Koha Ditore”)