Lehtësime ose kompensim në taksat për terrasat si pasojë e humbjeve që u janë shkaktuar nga punimet kanë kërkuar pronarët e lokaleve në rrugën “Fehmi Agani”, në kryeqytet.
Përfaqësuesesi i bizneseve, Veton Zuka, tha se të gjitha lokalet në rrugën e “Kafeve të vogla” janë dëmtuar financiarisht gjatë dy muajve të fundit për shkak të punimeve për rregullimin e infrastrukturës nëntokësore.
Andaj, sipas tij, Komuna e Prishtinës duhet të shqyrtojë mundësinë e ndonjë lehtësimi ose kompensimi për bizneset në taksën për terrasat.
Drejtori i Investimeve Kapitale, Gëzim Mehmeti, i këshilloi bizneset që këtë kërkesë ta përcjellin në mënyrë shkruar e zyrtare në Komunën e Prishtinës.
Pasi njoftoi se është dita e 35 e punës, Mehmeti shtoi se punimet do të përfundojnë brenda afatit 60 ditësh.
Punimet për rregullimin e kanalizimit dhe infrastrukturës përcjellëse në këtë rrugë kanë filluar më 28 mars.