Irlanda ofron ndihma në proceset europiane

Sot, ministri i Ministrisë për Forcën e Sigurisë së Kosovës, Rrustem Berisha priti ministrin e Mbrojtjes të Republikës së Irlandës, Paul Kehoe. Në takimin e përbashkët në mes të dy delegacioneve, ministri Berisha së bashku me ministrin e Republikës së Irlandës, Kehoe biseduan për bashkëpunimin e dyanshëm në mes të Kosovës dhe Republikës së Irlandës, MFSK-së dhe Ministrisë së Mbrojtjes të Irlandës si dhe për zhvillimet në fushën e sigurisë në Kosovë, rajon dhe më gjerë.

Berisha ka falënderuar ministrin e Irlandës Paul Kehoe për bashkëpunimin e deri tashëm dhe për ndihmën që Irlanda ka dhënë dhe po jep për Kosovën, duke e njoftuar me zhvillimet e përgjithshme në Ministri dhe në Forcën e Sigurisë së Kosovës.

Pas takimit të dy ministrat dhanë nga një deklaratë për media.

Ministri i FSK-së Rrustem Berisha në fjalën e tij ndër të tjera tha: ,,Patëm nderin dhe kënaqësinë që ta presim ministrin e Mbrojtjes të Republikës së Irlandës, Paul Kehoe të cilin e njoftuan në pika të shkurta me të arriturat e FSK-së, me progresin e FSK-së, sidomos me integrimin e komuniteteve jo shumicë, pjesëmarrjen e gjinisë femërore në strukturat e FSK-së, me objektivat dhe synimet tona si dhe me procesin e transformimit të FSK-së në FAK. Në të njëjtën kohë e falënderuam ministrin e mbrojtjes Kehoe, për mbështetjen dhe për përkrahjen që na kanë dhënë në rrugëtimin tonë drejt lirisë dhe sidomos pas luftës, e që vazhdojnë të japin edhe tani në kuadër të KFOR-it. Gjithashtu e falënderuam ministrin për faktin që Irlanda ka qenë ndër të parët që e ka njohur pavarësinë Kosovës. Biseduam edhe për avancimin e bashkëpunimit të dy ministrive në fushën e sigurisë dhe për modelet e bashkëpunimit, dhe se shumë shpejtë do ta nënshkruajmë memorandumin e bashkëpunimit në mes të dy ministrive në fushën e sigurisë”.

Ministri i Irlandës, Paul Kehoe falënderoi ministrin Berisha për pritjen e përzemërt dhe para mediave ndër të tjera deklaroi: ,,Jam i nderuar që jemi siç e përmendi ministri Berisha, ndër vendet e para që kemi njohur Pavarësinë e Kosovës. Është vizita e ime e parë në Kosovë, qëllimi i saj ishte vizita e pjesëtarëve të KFOR-it Irlandez, gjithashtu kam nderin që të jem këtu në mesin e juaj. Me ministrin biseduam për çështje të ndryshme siç është liberalizimi i vizave, integrimi në Bashkimin Evropian, në Kombet e Bashkuara etj.

do të ju afrojmë ndihmën tonë të pakursyer në këto procese, dhe do të jemi gjithmonë pranë jush posa ti plotësoni kërkesat relevante. Gjatë rrugëtimit e pashë që Kosova ka një të ardhme të ndritshme bazuar në progresin e bërë. Me ministrin biseduam edhe për avancimin e bashkëpunimit, veçanërisht në përgatitjen e memorandumin të bashkëpunimit ndërmjet dy ministrive”.