Disa invalidë të Ushtrisë Çlirimtare të Kosovës kanë protestuar sot për pak minuta para Qeverisë së Kosovës.
Ata janë ankuar se po u shkelen të drejtat e tyre nga ana e Qeverisë, duke mos ua paguar pagat që u takojnë, raporton KP.
Valentina Haliti, invalide e luftës, e cila në luftë kishte ardhur nga Shqipëria por sot nuk gëzon pensionin e saj që i takon me ligj.
Haliti tha se procesi i verifikimit të invalidëve është duke u zvarritur dhe për këtë arsye nuk po u njihet e drejta e pensionit.
Ish-luftëtarja e UÇK-së që tash është e martuar në Skenderaj tha se shumica e invalidëve jetojnë në kushte të tmerrshme ndërsa plot njerëz në Kosovë gëzojnë miliona.
Edhe
Për një vit, listës së veteranëve që përfituan pension iu shtuan 165 persona
“ Qëllimi jonë është të arrijmë të drejtat tona elementare që në janë mohuar nga shteti sepse ne kemi statusin por nuk e gëzojmë të drejtën e pensionit Ne po kërkojmë që të merret parasysh cdo pikë gjaku e invalidit sepse ne nuk jemi rastësisht këtu ne jemi të gjithë me probleme shumë të rënda shëndetësore dhe statusin e kemi që në 2015 certifikatën e mbajmë në shtëpi kurse beneficionet tona nuk i gëzojmë as pensionet nuk i marrim Ne na kanë lënë as veteran as invalid sepse asnjë lloj pagese nuk kemi nga shteti” , tha Haliti.
Edhe Xhevdet Jashari, që është plagosur në luftë ka treguar se nuk gëzon as pension por as nuk është i punësuar.
“Jam momentalisht pa asnjë pagesë , kam statusin e veteranit pastaj jam i plagosur dhe kam statusin e invalidit të luftës , momentalisht jam student i fakultetit juridik në vitin e katërt dhe jo vetëm që nuk jepet pagesa mirëpo edhe në institucione tjera nuk jepet një e drejtë të shoqata e invalidëve të luftës që të jepet një përparësi për punësim apo për shkollim” , tha Jashari.
Protestës së ftuar nga disa invalidë të UÇK-së iu ka përgjigjur edhe Fejzë Hoxha. Ai tha se ka humbur njërën veshkë në luftë por që deri më tani nuk merr pagë si invalid.
Edhe
Veteranët në marshin e UÇK-së kërkojnë lirimin e ish-krerëve në Hagë: Lufta jonë ishte e drejtë
“Si pasojë e luftës në vitin 1998 e kam humbur veshkën e djathtë , me 2 dhjetor 2010 kam aplikuar në Departament, drejtori Bajram Pajaziti ka qenë aty kur mu ka drejtuar ‘urime pensionin se meriton’ mirëpo kurrë nuk e kam marr atë pension” , tha Hoxha.
Nuk është hera e parë që në Kosovë protestojnë veteranët dhe invalidët e luftës. Qeveria e Kosovës ka sqaruar se invalidët e luftës nuk mund të marrin paga përderisa nuk formohet komisioni mjekësor që përcakton invaliditetin e tyre.
