Hoxhaj: PDK-ja nuk ka votë për Osmanin 

Ushtruesi i detyrës së kryetarit të PDK-së, Enver Hoxhaj, ka përsëritur se partia e tij nuk ka votë për Vjosa Osmanin për presidente të Kosovës. 

Hoxhaj ka thënë se Osmani është treguar figurë përçarëse e aspak përbashkuese. 

“Partia Demokratike e Kosovës nuk ka votë për Vjosa Osmanin për presidente të ardhshme të Kosovës. Ajo është treguar një figurë përçarëse, aspak përbashkuese dhe nuk e përfaqëson unitetin e popullit. Duke qenë e motivuar partiakisht dhe që përfaqëson interesat e vetëm një partie dhe liderit të saj, znj. Osmani nuk mund të jetë aspak e denjë për pozitën e presidentes. PDK-ja nuk do ta tradhëtojë besimin e votuesve të saj. Ne jemi partia e vetme në opozitë që do ta ballafaqojmë deri në fund pushtetin e ri, do t’i përfaqësojmë qytetarët e Kosovës dhe do ta mbajmë përgjegjëse për çdo premtim e vendim. PDK sikurse e kemi thënë gjatë zgjedhjeve, do të jetë fronti i vetëm politik në Kosovë kundër boshtit popullist të përfaqësuar nga z. Kurti”, ka shkruar Hoxhaj në Facebook.