Ministri i Jashtëm i Shqipërisë, Ferit Hoxha, i ka bërë thirrje homologut serb, Marko Gjuriq, që të lihen anash retorikat e panevojshme dhe joproduktive. Në një takim në kuadër të Forumit Diplomatik të Antalias, Hoxha ka thënë se dy udhëheqësit e kanë pranuar se kanë dallime thelbësore në raport me Republikën e Kosovës.
“Nënvizova domosdoshmërinë për të ruajtur, thelluar dhe forcuar bashkëpunimin rajonal si rruga më e besueshme drejt një të ardhmeje të përbashkët, duke lënë mënjanë retorikat e panevojshme dhe joproduktive. Shqipëria mbetet e përkushtuar të investojë në qartësinë e qëndrimeve të saj, në koherencën e politikës së jashtme, si dhe në forcimin e kontakteve mes njerëzve, duke kultivuar një brez të ri me vizion të qartë evropian”, ka shkruar Hoxha në X.
Kjo deklaratë vjen pas përsëritjes së zyrtarëve serbë se aleanca Kosovë-Kroaci-Shqipëri është kërcënim për Serbinë.
Hoxha po ashtu ka shtuar se dyja shtetet dallojnë thelbësisht në qëndrimet për Kosovën. Ai ka thënë se njohja e Kosovës do të ishte kontribut për paqen afatgjatë në rajon.
“Gjithashtu, pranuam se kemi qëndrime thelbësisht të ndryshme lidhur me Republikën e Kosovës. Rikonfirmova qëndrimin e qartë dhe të palëkundur të Shqipërisë mbi rëndësinë vendimtare të dialogut ndërmjet Kosovës dhe Serbisë, të ndërmjetësuar nga Bashkimi Evropian, si e vetmja rrugë e qëndrueshme drejt normalizimit të plotë të marrëdhënieve dhe njohjes reciproke, si një kontribut thelbësor për paqen e qëndrueshme dhe stabilitetin afatgjatë në rajon”, ka shkruar Hoxha.
Edhe
Hoxhaj: Humbja e Dialogut Strategjik është hap prapa me pasoja serioze
Hoxha ka shtuar se diskutimi i tyre u përqendrua në avancimin e raporteve përmes dialogut dhe bashkëpunimit konkret, “me synim forcimin e mëtejshëm të lidhjeve ekonomike dhe tregtare, duke vlerësuar rolin e tyre në nxitjen e zhvillimit të qëndrueshëm dhe të stabilitetit rajonal”.
Hoxha ka thënë se ka marrë përgjigje pozitive për hapjen e një Konsullate të Shqipërisë në Bujanoc.
