Hoti: Institucionet, peng i dy njerëzve që nuk zgjedhin mënyrë për pushtet

Në emër të deputetëve të LAA-së, Avdullah Hoti, ka thënë se deputetët po mblidhen për të gjashtën herë në sallë, në pamundësi për të zgjedhur institucionet.

“Ne kemi një qeveri kujdestare për të garantuar se rezultatet e 2 viteve e gjysmë punë nuk do të degradohen, por nga mungesa e institucioneve kemi humbje reale”, ka thënë Hoti.

Ai ka thënë se formimi i institucioneve është peng i “dy emrave, të cilët nuk zgjedhin asnjë rrugë për të ardhur në krye të pushtetit”.

“Na vjen keq që një grupim i tërë i deputetëve i prirë nga PDK i ka varë shpresat te disa matrapazë që provojnë të bindin dikë që të votojë për PAN-in”, ka thënë Hoti.

Ai ka thënë se nuk ka më logjikë që seanca të vazhdojë kësisoj, derisa ka shtuar se LAA-ja do të shqyrtojë çdo mundësi ligjore për të dalë nga kjo situatë.