Haradinaj: Marrëveshjet një nga një janë strategji e Serbisë për të blerë kohë

Kryetari i AAK-së, Ramush Haradinaj, ka thënë se dakordimi për të zbatuar një marrëveshje për dokumente, të arritur në vitin 2011, është një shenjë e mirë e vetëdijësimit se marrëveshjet duhet zbatuar.

Haradinaj në një postim në Facebook ka thënë se është për keqardhje që është dahsur të shpenzohet aq shumë kohë dhe energji për zbatimin e një marrëveshje që mundëson lirinë e lëvizjes së qytetarëve të dy vendeve.

“Marrëveshjet një nga një janë strategji e Serbisë për të blerë kohë e për ta vonuar Kosovën. Interesi shtetëror, nacional e qytetar i Kosovës është marrëveshja përfundimtare për njohje, e cila mund të arrihet vetëm me përfshirjen e drejtpërdrejtë të Shteteve të Bashkuara të Amerikës, pa ndihmën e të cilës nuk do të fillonte as zbatimi i marrëveshjes për dokumentet e identifikimit. Kanë kaluar njëzetë e sa vjet ç’prejse është krijuar një realitet i ri në Kosovë dhe mbi katërmbëdhjetë vjet qysh Kosova është shpallur shtet sovran dhe i pavarur. Tash është koha e duhur që dialogu të kalojë në një nivel tjetër dhe Serbia ta njohë Republikën e Kosovës”, ka shkruar Haradinaj në Facebook.