-
Nga:
Saranda Ramaj
- 8 gusht 2021 21:08
- Shpërndaje në:
Për herë të parë me Halit Sahitajn Prokuroria Speciale kishte pasur punë në vitin 2016. Mbi 600 mijë euro siç ka mësuar KOHA, i ishin bllokuar me kërkesë të kësaj prokurorie me arsyetimin se është transfer i dyshimtë për shkak se paratë vinin nga Rusia. Vetë Sahitaj sipas informatave që ka KOHA, asokohe pretendonte se në këtë prokurori i kishin kërkuar ryshfet që paratë të lirohen. Por pas denoncimit, ai ishte tërhequr nga këto pretendime
Halit Sahitaj është bërë i njohur javën e fundit për opinion në Kosovë, përmes audioincizimeve që e shpërfaqin fuqinë e tij për të ndikuar te krerët e institucioneve kryesore të drejtësisë.
Por, KOHA ka mësuar që Sahitaj ishte bërë i njohur për institucionet e drejtësisë rreth 5 vjet më herët. Hetuesia atëkohë e kishte lidhur për dyshime të tjera.
Për një tjetër histori penale, Prokuroria Speciale kishte dyshime në lidhje me Halit Sahitajn. Atij i ishin bllokuar mbi 600 mijë euro, me kërkesë të kësaj prokurorie të cilat kishin ardhur nga shteti i Rusisë. Por, Prokuroria Speciale dhe Prokuroria e Shtetit ka tri ditë që nuk janë përgjigjur se çfarë ka ndodhur me këtë hetim. A është proceduar apo është mbyllur?
Nga burime të saj, KOHA ka mësuar që këto para ishin bllokuar për faktin e vetëm se vinin nga Rusia, ndërsa Prokuroria Speciale nuk kishte ndonjë provë që e lidhte Sahitajn për ndonjë aktivitet kriminal në atë kohë.
Ndonëse kjo prokurori nuk e ka konfirmuar një hetim të tillë, ish-prokurori Faik Halilaj, i cili fillimisht ishte marrë me rastin ka pranuar se është një dijeni të këtij hetimi.
Por siç ka thënë, ai ishte larguar nga ky rast dhe nuk e di se kujt i ka kaluar.
“Unë kam hequr dorë më herët nga ky rast. Ia kam dhënë shefit tim. Shefi im ia ka dhënë një prokurori tjetër dhe çka ka ndodhë unë nuk e di. Unë kam dalë në pension në vitin 2018. Jo nuk e kemi përfunduar, as nuk e di rrjedhjen e atij rasti, fare nuk jam në rrjedha”, ka thënë Faik Halilaj, ish-prokuror special.
Por, edhe të tjera dyshime kishin lindur para katër vjetësh.
Burime brenda PSRK-së, i kanë thënë KOHËS se Sahitaj asokohe pretendonte që dikush nga ky institucion i kishte kërkuar ryshfet që paratë e bllokuara t’i liroheshin.
E një denoncim i tillë kishte shkuar deri në polici, por siç kanë thënë burimet, më pas Sahitaj ishte tërhequr nga këto pretendime.
Një rrjedhë të ngjashme e ka konfirmuar Policia e Kosovës përmes një përgjigjeje me shkrim.
“Më datë 06.09.2016, nga prokurori i PRSK-së, Drejtoria për Hetimin e Krimeve Ekonomike dhe Korrupsionit ka pranuar kërkesë për intervistimin e palës ankuese H. S.(1966) rreth pretendimeve që disa persona i kishin kërkuar para për t’i ndihmuar në kryerjen e një lënde që e kishte në PSRK. Hetuesit kanë intervistuar palën ankuese më datë 07.09.2016, në prezencën e avokatit të tij dhe pala ka mohuar në tërësi që ndonjë person zyrtar i ka kërkuar favore apo mjete monetare për përfundimin e lëndës në PSRK-së. PSRK-ja është njoftuar me raport rreth intervistës më 14.09.2016. PSRK-ja ka njoftuar DHKEK-në më 20.10.2016 se është mbyllur hetimi për këtë çështje”, thuhet në përgjigjen e Policisë.
KOHA ka provuar të vendosë kontakt me Sahitajn, por ka qenë e pamundshme. Nuk ka qenë i qasshëm në numrin e telefonit që ka siguruar KOHA.
Javën e fundit në media janë publikuar disa audio-incizime të Sahitajt me zyrtarë të lartë e një gazetar, ku sipas këtyre bisedave, ata kishin pranuar t’i kryenin favore.