Gjykatësit serbë në veri nisën punën sot, u duhen edhe 10 ditë për funksionalizim të plotë

Në Gjykatën Themelore të Mitrovicës kanë nisur punën 40 gjyqtarët serbë, të dekretuar nga presidenti Hashim Thaçi.

Për shkak të kushteve teknike, orari i tyre i punës ishte më i shkurtër.

Kryetari i kësaj Gjykate, Nikolla Kabashiq, thotë se u duhen së paku 10 ditë për të funksionuar plotësisht.

Ndërkohë, deputeti i pavarur, Korab Sejdiu, ka ngritur një shqetësim. Ai thotë se është vërtetuar se gjyqtarët dhe prokurorët serbë nuk u betuan njëjtë me gjyqtarët e tjerë.

Në deklaratën e nënshkruar nga ta, në asnjë vend nuk është përmendur Republika e Kosovës e as Kushtetua.

Dekretimin e 40 gjyqtarëve dhe 13 prokurorëve serbë, Presidenca e Kosovës e ka cilësuar si zbatim të plotë të marrëveshjes për drejtësi të arritur në Bruksel, më 10 shkurt 2015.