-
Nga:
Mehmet Krasniqi
- 29 dhjetor 2018 20:17
- Shpërndaje në:
Me nderime të larta shtetërore i është dhënë lamtumira e fundit policit 42-vjeçar, Izet Demaj, i vrarë pasditen e së enjtes, nga një grabitës në qendër të Istogut.
Ai u varros në varrezat e dëshmorëve në Koshare, vend në të cilin 19 vjet më parë luftoi për lirinë e Kosovës, si pjesëtar i brigadës 138 “Agim Ramadani” të UÇK-së, raporton KTV.
Nën përcjelljen e Gardës Ceremoniale të Policisë së Kosovës, arkivoli me trupin e Demajt u bart nga shtëpia e tij në Vrellë të Istogut për në kompleksin e Koshares.
Qytetarë të shumtë iu bashkuan kortezhit.
Për më shumë se gjysmë ore, familjarë, zyrtarë shtetërorë, kolegë e qytetarë të shumtë bënë homazhe para trupit të policit të ndjerë.
Edhe
Gjithçka rreth ceremonisë së varrimit të policit Izet Demaj
Familjarët, vështirë e përballuan lamtumirën e fundit me Demajn.
Valza Demaj, e vajza e vogël e Izet Demajt, tha se ajo dhe motra e saj do të rriten me shpresën që Kosova të jetë e sigurt.
Kryeministri Ramush Haradinaj, tha se polici Demaj i dha nder shtetit jo vetëm në uniformën e policisë, por edhe si ushtar i lirisë.
Ai shtoi se rasti i Demajt është porosi e qartë që nuk guxojnë kurrë t’i lënë policët vetëm.
Edhe
Arkivoli i policit Demaj niset për te varrezat e dëshmorëve në Koshare
Për të nderuar Izet Demaj, e shtuna ka qenë ditë zie në Kosovë.
Demaj ka lënë pas vetes gruan dhe dy vajza.
