-
Nga:
Valbona Bytyqi
- 20 mars 2024 15:23
- Shpërndaje në:
Komisioni Qendror Zgjedhor ka nisur me funksionalizimin e zyrave komunale në veri të vendit, derisa janë një muaj larg mbajtjes së procesit të votimit për shkarkimin e kryetarëve. KOHA përcolli përgatitjet e zyrtarëve të KQZ-së në dy komuna.
Në zyrën e vjetër, të demoluar tërësisht nga sulmi me eksploziv një vit më parë, zyrtarët e Komisionit Qendror të Zgjedhjeve, u kthyen të mërkurën.
Elementet në këtë zyre, ato që ishin funksionale ende, i mblodhën për t'i përdorur në objektin e komunës së Mitrovicës së Veriut, nga ku do të përgatiten për procesin e votimit të shkarkimit të kryetarit që do të mbahen më 21 prill.
Nën përcjelljen e Policisë, ekipet u ndanë në dy grupe të tjera.
Njëra u nis për në Leposaviq e tjera për në Zubin Potok. Brenda objektit komunal, nuk u lejua xhirimi e para kamere nuk u prononcuan zyrtarët e KQZ-së.
Prapa saj, thanë se tashmë kanë në posedim zyrat e tani do të nisin me përgatitjet e nevojshme.
Përveç objektit të komunës së Zubin Potokut, zyrtarët e Komisioneve Komunale Zgjedhore do të vendosen në zyra edhe në Leposaviq derisa në pritje të vendimit janë edhe për të shfrytëzuar objektin e komunës së Zveçanit.
Objekti i Komisionit Komunal Zgjedhor të Mitrovicës së Veriut u sulmua me granatë dorë.
Për këtë sulm i arrestuar është ish-zyrtari i Policisë së Kosovës, Dejan Pantiq.
Të dielën e fundit të prillit, në katër komunat në veri, Leposaviq, Zvecan, Zubin Potok e Mitrovicë e Veriut, do të mbahet votim për shkarkimin e kryetarëve jo serbë.
Nëse ky proces rezulton i suksesshëm, në këto komuna do të shpallen zgjedhjet e parakohshme.
