Komandanti i përgjithshëm i FSK-së, Rrahman Rama, ka raportuar para Komisionit për Punë të Brendshme dhe Siguri.
Rama tha se FSK është e gatshme në çdo moment dhe kohë kurdo që merret vendimi politik për transformimin në Forca të Armatosura.
Ai shtoi se nuk ka asnjë tendencë që janë duke ndërtuar një forcë që është rrezik për dikë tjetër, por një forcë, e cila është në interes të të gjithëve.
Deputeti nga Vetëvendosje, Rexhep Selimi, tha se FSK është institucioni më kredibil në vend. Sipas tij, kjo më së miri manifeston dëshirën e qytetarëve për ta pasur mbrojtjen ushtarake të saj, raporton Kosovapress.
Selimi shtoi se edhe transformimi është një sfidë. Ai u shpreh i bindur që FSK do të zbatojë vendimin e Kuvendit për transformimin e FSK-së në ushtri.
Deputeti i PDK-së, Fatmir Xhelili, kërkoi nga komandanti Rama të sqarojë procesin e transformimit dhe kohën deri të ndodh kjo.
Ndërsa Rama tha se është e pamundshme të ndërrohet një mision për një kohë të shkurtër.
Edhe
Rama: Transformimi i FSK-së ka qenë sfidues, por i suksesshëm
Ai tha se me rëndësi është që t’i mbajë këto kapacitete në mënyrë që të përgatiten për sfidat e reja. Rama tha se nëse institucionet vendosin, atëherë kohën mund ta shkurtojnë, por që sipas tij ka edhe implikime buxhetore.
Deputeti i AAK-së, Muharrem Nitaj, ka kërkuar që të dijë për përfaqësimin gjinor, përqindjen e minoriteteve, etj.
Në përgjigjen e tij, Rama tha se 8 për qind në FSK janë femra, grada më e lartë që e mban një femër është kolonele, 10.2 për qind janë komunitete, derisa tha se FSK ka 2500 pjesëtarë aktivë dhe 300 rezervë.
