Përditësim 19:43 - Një stuhi që ka prekur Prishtinën të shtunën pasdite ka rrëzuar disa drunj në qendër e në lagjen Ulpiana, ka njoftuar Drejtoria për Siguri dhe Emergjenca e kryeqytetit. E sipas njoftimit, në të njëjtën kohë ka pasur zjarre fushore në disa lokacione.
“Para vetëm pak orësh, një stuhi 🌪️ shkaktoi rrëzimin e disa drunjve në Rrugën Rexhep Luci dhe në Ulpianë, ndërsa paralelisht u përballëm me disa zjarre fushore në Hajvali dhe në lokacione të tjera të Kryeqytetit. Brigada Profesionale e Zjarrfikësve, ekipet emergjente të Drejtorisë për Siguri dhe Emergjenca dhe Policia e Kryeqytetit kanë qenë menjëherë në terren, duke reaguar me profesionalizëm dhe përkushtim për të mbrojtur qytetarët dhe pronën publike e private”, thuhet në njoftimin e kësaj drejtorie në Facebook.
Fryma rrëzon një lis në qendër të Prishtinës, intervenojnë zjarrfikësit
Një lis është rrëzuar nga fryma në rrugën “Rexhep Luci” në qendër të Prishtinës, të shtunën pasdite.
Nuk është raportuar për të lënduar, pos për dëme materiale.
Ekipet e zjarrfikësve kanë dalë në vend të ngjarjes dhe po i largojnë pjesët e lisit.
“Sot në ora 15 kemi marrë informatë se në rrugën ‘Rexhep Luci’ është rrëzuar një lis. Ekipet e BPZ kanë dalë në vendngjarje dhe janë duke i marrë të gjitha masat që të largohen pjesët e tij. Nuk ka informata për të lënduar, por vetëm dëme materiale”, ka thënë për KOHËN Muhamet Reqani nga zjarrfikësit në Prishtinë.
Sipas tij, bëhet fjalë për një lis të vjetër.
Mot me reshje shiu e edhe mundësi për breshër ka paralajmëruar për sot, Instituti Hidrometeorologjik i Kosovës.