Është koha e fundit kur Kosova duhet të vendosë sistemin e vetingut, tha deputetja nga radhët e Lëvizjes Vetëvendosje, njëherësh edhe kryetare e Komisionit Parlamentar për Legjislacion, Albulena Haxhiu.
Këtë e tha në një diskutim me studentët në kuadër të Javës Kundër Korrupsionit, të organizuar nga Lëvizja “Fol” dhe “Demokracia Plus”.
Ajo shtoi se Kosova vazhdon të qëndrojë keq sa i përket korrupsionit, bazuar në raporte ndërkombëtare, siç është indeksi i “Transparency International”.
E pyetur nga studentët se cilët janë 3 hapat konkretë për të parandaluar korrupsionin, ajo tha se do të duhej të ishte vullneti politik, baza ligjore si dhe profesionalizimi i policisë, prokurorisë dhe gjykatave.
Haxhiu ka folur edhe për liberalizmin e vizave, duke thënë se Kosova nuk ka punuar sa duhet për ta fituar këtë të drejtë.