Presidentja Vjosa Osmani, ka emëruar të enjten 27 anëtarët e rinj të Këshillit Konsultativ për Komunitete (KKK).
Zyra e Presidentes ka sqaruar se si shkon procesi i emërimit të tyre.
Emërimi për mandat dy vjeçar i anëtarëve të KKK-së, është rezultat i një procesi të nominimit brenda secilit komunitet dhe në fund emërimit të tyre nga presidentja.
Bazuar në Rregulloren e KKK-së, brenda 30 ditëve pas emërimit të anëtarëve të rinj, Këshilli e mban takimin e vet konstituiv, i cili do të kryesohet nga anëtari më i vjetër i Këshillit dhe nga radhët e tij zgjedh kryesinë e Këshillit.
KKK-ja përbëhet nga 27 anëtarë, përfaqësues të të gjitha komuniteteve të Kosovës, siç është përcaktuar me nenin 12 (6) të Ligjit për Mbrojtjen dhe Promovimin e të Drejtave të Komuniteteve dhe Pjesëtarëve të Tyre në Republikën e Kosovës, që përfshinë:
· nga dy përfaqësues të komunitetit rom, egjiptian, goran, ashkali, malazez dhe kroat
· nga tre përfaqësues të komunitetit boshnjak dhe turk,
· pesë përfaqësues të komunitetit serb,
· një përfaqësues i lartë i Zyrës së Presidentes;
· tre përfaqësues të lartë të Qeverisë, që caktohen nga ministria apo agjencia, fushëveprimi i të cilëve është me rëndësi të veçantë për komunitetet.
“Këshilli Konsultativ për Komunitete ka për qëllim sigurimin e mekanizmit për shkëmbimin e mendimeve në mes të komuniteteve dhe institucioneve të Republikës së Kosovës. KKK-ja u ndihmon komuniteteve dhe bën artikulimin e qëndrimeve të komuniteteve joshumicë dhe përfaqësuesve të tyre kur janë ne pyetje legjislacioni, politikat publike dhe programet më rendësi të veçantë për komunitetet”, thuhet në komunikatën e ZPRK-së.