Komuna e Drenasit, në vitin 2016, kishte ndarë afër 130 mijë euro për asfaltimin e rrugës që lidh fshatrat Qikatovë e vjetër-Dobroshec, por kur kishte filluar të implementohet projekti, ai ishte devijuar. Projekti shkoi në fshatit Gllanasellë, raporton KTV.
Kjo rrugë që çon në Dobroshec të komunës së Drenasit ka mbetur e paasfaltuar, ndonëse kuvendi komunal, në vitin 2016, pati ndarë mjetet për të.
Përveç vendimit të kuvendit, ishte shpallur edhe tenderi për asfaltimin e rrugës që lidh fshatrat Qikatovë e vjetër-Dobroshec dhe ishte nënshkruar kontrata, por kur kishte filluar realizimi i këtij projekti, ai ishte devijuar, duke asfaltuar rrugën që çon në fshatin Gllanasellë.
Kjo, sipas opozitës, është në kundërshtim me ligjin.
Banorët e fshatit Dobroshec thonë se asfaltimi i rrugës është më se i nevojshëm dhe se nuk e dinë arsyen pse nuk është bërë deri më tash.
Ndërsa Drejtori i Urbanizmit në këtë Komunë, Idriz Hysenaj, shkurt ka thënë se projekti ende nuk ka përfunduar, pa shpjeguar se pse është devijuar ai.