Deri në 40 gradë Celsius parashihen temperaturat sot.
Sipas Institutit Hidrometeorologjik të Kosovës, të shtunën priten vranësira të pakta.
Vranësirat do të dendësohen dhe vende-vende parashihen të sjellin riga shiu të përcjella me stuhi lokale .
Temperaturat minimale do të lëvizin ndërmjet 16-20°C, ndërsa ato maksimale pritet të jenë ndërmjet 36- 40°C.
Instituti Kombëtar i Shëndetësisë Publike të Kosovës ka publikuar udhëzime për mbrojtje nga të nxehtit dhe temperaturat e larta. Sipas tij, periudhat e gjata me temperatura të larta gjatë ditës dhe natës krijojnë stres në trup dhe rrisin rrezikun e sëmundjeve apo vdekjeve nga ekspozimi ndaj nxehtësisë.
Veprimet që duhet të ndërmerren për t’u mbrojtur:
Qëndroni larg të nxehtit: Shmangni daljet dhe aktivitetet e rënda gjatë orëve më të nxehta. Qëndroni në hije dhe kaloni 2-3 orë në një vend të freskët.
Mbajeni trupin të freskët dhe të hidratuar: Përdorni veshje të lehta (pambuku), bëni dush të freskët, lagni lëkurën dhe pini ujë rregullisht (1 gotë/orë – 2-3 litra/ditë).
Mbajeni shtëpinë të freskët: Ajroseni gjatë natës kur jashtë është më freskët. Ditën mbyllni dritaret dhe përdorni perde për të penguar rrezet e diellit.
Kujdesi për grupet e cenueshme:
Për të moshuarit mbi 65 vjeç: Kontaktoni rregullisht sidomos ata me sëmundje kronike, aftësi të kufizuar apo që jetojnë vetëm.
Për fëmijët: 🚫 Mos i lini kurrë në automjete të parkuara. Shmangni ekspozimin në diell gjatë orëve më të nxehta (10:00–17:00).
Në rast emergjence: Kontaktoni mjekun më të afërt ose telefononi 194.