Nënkryetarja e Partisë Demokratike të Kosovës, Vlora Çitaku, ka akuzuar Qeverinë e Kosovës e parëtinë në pushtet Lëvizjen Vetëvendosje për keqqeverisje duke thënë se krizat e konfliktet që ata po i krijojnë me aleatët, po ua lënë në hije “skandalet në qeverisjen e brendshme”.
“Kryeministri dhe eksponentët e VV vazhdojnë të krijojnë kriza dhe konflikte me aleatët. Kacafytjet e tyre publike herë me SHBA-në, herë me BE-në u kanë sjellë vetëm një të mirë. Po ua lënë në hije skandalet e njëpasnjëshme në qeverisjen e brendshme”, ka shkruar Çitaku në Facebook.
Ajo ka akuzuar VV-në për emërime politike, një ditë pasi kryeshef i Korporatën Energjetike të Kosovës, u emërua ish-kandidati për asamble i VV-së në komunën e Fushë-Kosovës.
“Dje një zyrtar i VV-së u emërua drejtor i KEK-ut. Kjo pas arrestimit të ish-drejtorit, i cili po ashtu ka qenë zyrtar i VV-së. Tashmë është e qartë, përplasjet me aleatët, në emër të sovranitetit, po bëhen për të kompensuar mungesën e sukseseve në qeverisje , dhe për të mbuluar skandalet. Nuk do të ketë jetë të gjatë kjo mendësi”, ka shkruar Çitaku.
