Bejtullahu: Po manipulohen provat, e shoferi që goditi babanë është i lirë

Dy muaj pasi një këmbësor është goditur për vdekje në rrugën “Bill Clinton” në lagjen “Dardania” në Prishtinë, personi që ka shkaktuar aksidentin vazhdon të jetë i lirë. Vajza e viktimës u ankua se institucionet e rendit dhe ato të drejtësisë nuk e trajtuan dinjitetshëm rastin, ndërsa për ngasësin e veturës tha se është fëmijë i një biznesmeni që ka lidhje të forta edhe me politikën

E zhgënjyer dhe e tronditur me institucionet e rendit dhe të drejtësisë është shprehur të mërkurën Sihana Bejtullahu, vajza e Ferhat Bejtullahut, i cili më 2 dhjetor të vitit të kaluar u godit për vdekje nga një veturë në rrugën “Bill Clinton” në lagjen “Dardania” në Prishtinë.

Vajza e viktimës i ka thënë KOHËS se edhe dy muaj pasi ndodhi rasti, shoferi që shkaktoi vdekjen e babait të saj endet i lirë e institucionet nuk i japin asnjë informacion se deri ku është proceduar lënda.

“U kam shkruar të gjitha institucioneve, duke filluar nga Kryeprokurori i Shtetit, Kryeprokurori i Prishtinës, prokurores së rastit, policit dhe po ashtu kam dërguar ankesë tek Inspektorati Policor për sjelljen e padinjitetshme dhe joprofesionale të policit të rastit”, ka thënë Bejtullahu.

Ajo ka treguar përvojën në institucione që thotë se është tejet e hidhur dhe e rëndë për të e për familjen.

Sipas saj, autoritetet kanë treguar papërgjegjshmëri të plotë në këtë rast.

“Polici thotë se e kam dorëzuar lëndën në Prokurori, Prokuroria thotë se nuk është lënda. Prokurorja e rastit nuk ka dalë në vendngjarje pavarësisht humbjes së një jete, e cila thotë se tash jam larguar nga rasti, kam qenë kujdestare... Është një trajtim i padinjitetshëm, një zvarritje që po i bëhet një familjeje që ka humbur personin e tyre shumë të dashur, nga institucionet tona. Jam e shokuar, e tronditur, e traumatizuar prej këtij rasti”, ka thënë Bejtullahu.

Bejtullahu thotë se personi që goditi për vdekje babanë e saj e që nuk ka marrë kurrfarë dënimi nga institucionet, ka lidhje të forta me politikën. Ai është djali i një biznesmeni.

Edhe LAJMET E MBRËMJES 15 maj 2025 I akuzuari për goditjen vdekjeprurëse të këmbësorit deklarohet i pafajshëm

KOHA dërgoi pyetje te personi që dyshohet se ka shkaktuar aksidentin me fatalitet, te Prokuroria, Gjykata dhe Policia, por nuk mori ndonjë përgjigje të mërkurën.

E, bazuar në njoftimin e Policisë për aksidentin, theksohet se nga pakujdesia i dyshuari ka goditur këmbësorin dhe se me vendim të prokurorit, pas intervistimit është liruar.

Gjatë ditës një reagim publik e ka bërë familja e Ferhat Bejtullahut që ka vdekur pas goditjes nga vetura. Në të alarmohet për mundësinë e “manipulimit të provave” nga institucione ligjzbatuese.