BE-ja do t’i vëzhgojë zgjedhjet lokale të tetorit “me mision të plotë”

Presidenca e Kosovës ka njoftuar se Bashkimi Evropian i është përgjigjur pozitivisht kërkesës së presidentes Vjosa Osmani për monitorim të zgjedhjeve lokale të tetorit në Kosovë.

Më 18 qershor, Osmani pati kërkuar nga BE-ja që të monitorojë këto zgjedhje, dhe tani nga Presidenca njoftohet se David Sassoli, kryetar i Parlamentit Evropian, dhe Josep Borell, përfaqësues i lartë i BE-së për Politikë të Jashtme, i janë përgjigjur pozitivisht. Sipas njoftimit, për dallim nga zgjedhjet e fundit parlamentare, kur “Misioni i BE-së për vëzhgimin e zgjedhjeve është përbërë nga një numër i vogël ekspertësh, në zgjedhjet lokale të vitit 2021, BE-ja do të jetë prezente me mision të plotë të vëzhgimit të zgjedhjeve në Republikën e Kosovës deri në certifikimin e rezultatit zgjedhor”.

Pritet që Parlamenti Evropian t’i nominojë përfaqësuesit e vet, ndërsa Përfaqësuesi i Lartë i BE-së do ta emërojë Shefin e Misionit që bashkë me ekspertët do të arrijnë në Kosovë javëve në vijim.